Biyl kólik infraqurylymyn damytý jobalaryna 18 mln tonna qiyrshyq tas, 120 myń tekshe metr temirbeton jáne 1 mln 300 myń tonna bitým qajet. Indýstriia jáne infraqurylymdyq damý ministri Beibit Atamqulov Úkimet otyrysynda osy qajettilikter qalai qamtamasyz etiletinin baiandady, dep habarlaidy QazAqparat.
«Qazir qurylys maýsymyna daiyndyq júrgizilip jatyr. Biylǵy mindetterdi oryndaý úshin 18 mln tonna qiyrshyq tas, 120 myń tekshe metr temirbeton buiym jáne 1 mln 300 myń tonna bitým qajet», - dedi vedomstvo basshysy.
Ministrliktiń deregi boiynsha, eldegi bitým zaýyttary jylyna 1 mln tonna ónim shyǵara alady. Iaǵni, qosymsha 300 myń tonna bitýmdy syrttan alý qajet degen sóz.
«Qazir qiyrshyq tas pen temirbeton buiymdary tolyq daiyndalǵan. Sondai-aq, bitýmnyń 325 myń tonnasy ázirlendi. Jyl saiyn qurylys maýsymynda bitým tapshylyǵy baiqalyp, naryqta baǵa kóterilip jatady. Bul jumystardyń barysyna áser etpei qoimaidy. Qazirgi ýaqytta Energetika ministrligimen bitýmdy ýaqtyly jetkizý jáne baǵanyń ósýine jol bermeý máselesin pysyqtap jatyrmyz», - dedi Beibit Atamqulov.
Ministr biylǵy maýsymda 20 myń jol-qurylys tehnikasy, 81 asfaltbeton zaýyty men 79 usaqtap-suryptaý qondyrǵysy jumyldyrylatynyn atap ótti.
«Jalpy alǵanda, jol-qurylys jumystaryna 200 myńǵa jýyq adam tartylady. Ońtústik óńirlerde qurylys jumystary bastalyp ketti. Aýa-raiy jylynǵannan keiin qurylys jumystary barlyq nysanda bastalady», - dedi sala basshysy.
Eske salsaq, Indýstriia jáne infraqurylymdyq damý ministri atalmysh sharada aldaǵy 5 jylda qansha jol salynatyny týraly málimet bergen bolatyn.
Sondai-aq, biyl Taldyqorǵan-Óskemen baǵytyndaǵy 768 shaqyrym jolda rekonstrýktsiialaý jumystary aiaqtalatyny belgili boldy.
