Respýblikalyq diagnostika ortalyǵynyń klinikalyq immýnologiia, allergologiia jáne pýlmonologiia bóliminiń meńgerýshisi, m.ǵ.d. Elena Kovzel 1 aqpanda bastalatyn koronavirýsqa qarsy vaktsinaǵa qatysty pikirin bildirdi, dep habarlaidy Baq.kz agenttigi.
Koronavirýsqa bailanysty vaktsinatsiianyń bastalýy - kútken naýqan. Memleket pen densaýlyq saqtaý ministrligi azamattardy atalǵan indetten qorǵaý úshin osyndai usynys jasap otyr. Al onyń tiimdiligi qalai bolatynyn aitý óte qiyn. Árine, jaqsylyqtan úmittenemiz. Qalai desek te, indetten qorǵaný úshin bul vaktsina qajet. Onyń ústine bul vaktsina COVID-19 indetiniń burynǵy belgilerinen ǵana emes, basqa da túrlerinen qorǵaidy. Vaktsinalaý birinshi kezekte oqytýshylarǵa, áskeri qyzmetkerlerge jáne meditsina qyzmetkerlerine salynady. Biz sol kezde osy aktsiianyń qanshalyqty tiimdi ekenin baiqai alamyz. Sosyn halyqtyń basqa bóligine salýdy jalǵastyrýǵa bolady, - deidi Elena Kovzel.
Ol osy vaktsinalaýǵa qarsy shyǵyp jatqan taraptyń pikirine qatysty da oiyn bildirdi.
Vaktsinalaýǵa qatysty negativti pikirlerdiń bar ekeni ras. Bir jaǵynan ol adamdardy túsinemin. Internette naqtylanbaǵan jalǵan aqparattar órip júr. Sondyqtan adamdar kimge senerin bilmei qalady. Biraq aitarym, Densaýlyq saqtaý ministrligi naryqta bar vaktsinanyń ishinde eń ozyǵyn tańdap otyr. Gamalei atyndaǵy institýttyń 150 jyldan beri tájiribesi bar. Biz halyqqa bul vaktsinanyń qajet jáne qaýipsiz ekenin dáleldei alamyz dep oilaimyn. Ózimniń dáriger retinde 25 jyldyq tájiribem bar. Jalpy praktikada vaktsinanyń arqasynda milliondaǵan adamdardyń ómirin qutqaryp jatqanymyzǵa kýámin. COVID-19 bastalǵan 2019 jyldyń sońy men byltyrǵy jyly qanshama azamattarymyz osy indetten ómirden ótip ketti. Eger vaktsina salynǵan kezde birazyn qorǵap qalýǵa bolar edi. Vaktsina qalai desek te adamdardyń ómirin qorǵaýǵa kerek, - deidi dáriger.
Ol osy rette «Vaktsina salynǵannan keiin adamdar emin-erkin júre ala ma?» degen saýalǵa jaýap berdi.
Virýsqa qarsy profilaktika mindetti túrde qajet. Jalǵyz koronavirýs emes, tumaý, paragripp bar. Al naqty koronavirýsqa toqtalatyn bolsaq, bul jerde aǵzaǵa virýs qanshalyqty taraǵany mańyzdy. Vaktsina alǵan adam ómir boiyna indetten qorǵanyp júrýi múmkin emes. Biraq bir ret vaktsina kemi 2 jylǵa jaramdy bolady, - deidi Elena Kovzel.
Aita keteiik, Qazaqstanda koronavirýs infektsiiasyna qarsy vaktsinany 1 aqpannan bastap egý josparlanyp otyr. Bul týraly Úkimet otyrysynda Densaýlyq saqtaý ministri Aleksei Tsoi habarlaǵan bolatyn. Ministrdiń aitýynsha, halyqqa ekpe jumystary vaktsinanyń jetkizilý mólsherine qarai salynady. Dúniejúzilik densaýlyq saqtaý uiymynyń málimeti boiynsha, qazir álemde 25 vaktsina synaqtan ótip, taǵy 100-den astamy ázirlenip jatyr.
