Atyraýda №2 oblystyq infektsiialyq aýrýhananyń dárigerleri koronavirýstan qaitys bolǵan áriptesi Jumabek Dáýletovtiń kásibi, adamgershilik qasieti týraly aityp berdi, dep habarlaidy "Ult aqparat".
Qaýipti indetke shaldyqqan naýqastardy emdegen infektsionist-dárigerdiń biri – Jumabek Dáýletov Aqtóbe meditsina institýtyn bitirgen. Ol eńbek jolyn 1981 jyly Balyqshy aýdandyq aýrýhanasynda bastaǵan. Keiin 1998 jyly oblystyq infektsiialyq aýrýhanaǵa jumysqa aýysqan.
«Jumabek Baǵytuly bul aýrýhanada alǵashqyda - reanimotolog, odan soń ómiriniń sońyna deiin infektsionist bolyp eńbek etti. Aimaqqa esimi keńinen taralǵan dáriger ýaqytpen sanaspaityn. Óz isine úlken jaýapkershilikpen qaraýshy edi», - deidi №2 oblystyq infektsiialyq aýrýhana direktorynyń keńesshisi Aslan Jeńisuly.
Birge eńbek etken áriptesteriniń aitýyna qaraǵanda, Jumabek Dáýletov 40 jylǵa jýyq dárigerlik eńbek jolynda oba, holera, túineme sekildi virýsty indetpen aýyrǵan jandarǵa emimen de, jyly sózimen de shipa darytqan. Aýrýhanada jetispeitin dárigerlerdiń mindetin qosa atqarýdan eshqashan tartynbaǵan. Tipti, talai ret qan qysymy kóterilip otyrsa da, jumys ornyn tastap ketpegen.
«Ol – dárigerlik antyna adal, aq halatyna qylaýdai daq túsirmegen taza jan edi. Jas býynǵa jón silter aqylshy boldy. Meiirbikeler men tazalyqshylarǵa aǵasyndai qamqor qolyn sozatyn janashyr jan edi» dep eske alady áriptesteri.
Aita keteiik, infektsionist-dáriger Jumabek Dáýletov koronavirýstan qaitys bolǵannan keiin Prezident Jarlyǵymen «Qurmet» ordenimen marapattaldy.
