اتىراۋدا №2 وبلىستىق ينفەكتسييالىق اۋرۋحانانىڭ دەرٸگەرلەرٸ كوروناۆيرۋستان قايتىس بولعان ەرٸپتەسٸ جۇمابەك دەۋلەتوۆتٸڭ كەسٸبي, ادامگەرشٸلٸك قاسيەتٸ تۋرالى ايتىپ بەردٸ, دەپ حابارلايدى "ۇلت اقپارات".
قاۋٸپتٸ ٸندەتكە شالدىققان ناۋقاستاردى ەمدەگەن ينفەكتسيونيست-دەرٸگەردٸڭ بٸرٸ – جۇمابەك دەۋلەتوۆ اقتٶبە مەديتسينا ينستيتۋتىن بٸتٸرگەن. ول ەڭبەك جولىن 1981 جىلى بالىقشى اۋداندىق اۋرۋحاناسىندا باستاعان. كەيٸن 1998 جىلى وبلىستىق ينفەكتسييالىق اۋرۋحاناعا جۇمىسقا اۋىسقان.
«جۇمابەك باعىتۇلى بۇل اۋرۋحانادا العاشقىدا - رەانيموتولوگ, ودان سوڭ ٶمٸرٸنٸڭ سوڭىنا دەيٸن ينفەكتسيونيست بولىپ ەڭبەك ەتتٸ. ايماققا ەسٸمٸ كەڭٸنەن تارالعان دەرٸگەر ۋاقىتپەن ساناسپايتىن. ٶز ٸسٸنە ٷلكەن جاۋاپكەرشٸلٸكپەن قاراۋشى ەدٸ», - دەيدٸ №2 وبلىستىق ينفەكتسييالىق اۋرۋحانا ديرەكتورىنىڭ كەڭەسشٸسٸ اسلان جەڭٸسۇلى.
بٸرگە ەڭبەك ەتكەن ەرٸپتەستەرٸنٸڭ ايتۋىنا قاراعاندا, جۇمابەك دەۋلەتوۆ 40 جىلعا جۋىق دەرٸگەرلٸك ەڭبەك جولىندا وبا, حولەرا, تٷينەمە سەكٸلدٸ ۆيرۋستى ٸندەتپەن اۋىرعان جاندارعا ەمٸمەن دە, جىلى سٶزٸمەن دە شيپا دارىتقان. اۋرۋحانادا جەتٸسپەيتٸن دەرٸگەرلەردٸڭ مٸندەتٸن قوسا اتقارۋدان ەشقاشان تارتىنباعان. تٸپتٸ, تالاي رەت قان قىسىمى كٶتەرٸلٸپ وتىرسا دا, جۇمىس ورنىن تاستاپ كەتپەگەن.
«ول – دەرٸگەرلٸك انتىنا ادال, اق حالاتىنا قىلاۋداي داق تٷسٸرمەگەن تازا جان ەدٸ. جاس بۋىنعا جٶن سٸلتەر اقىلشى بولدى. مەيٸربيكەلەر مەن تازالىقشىلارعا اعاسىنداي قامقور قولىن سوزاتىن جاناشىر جان ەدٸ» دەپ ەسكە الادى ەرٸپتەستەرٸ.
ايتا كەتەيٸك, ينفەكتسيونيست-دەرٸگەر جۇمابەك دەۋلەتوۆ كوروناۆيرۋستان قايتىس بولعاننان كەيٸن پرەزيدەنت جارلىعىمەن «قۇرمەت» وردەنٸمەن ماراپاتتالدى.
