Memleket qairatkeri Imanǵali Tasmaǵambetov Qazaqstan halqyna úndeý jasady, dep habarlaidy Abai.kz portaly.
"Aǵaiyndar, baýyrlar, azamattar!
Osynaý qańtardyń qaharly kúnderi elimizde, onyń ishinde ainalaiyn aq Almatymyzdyń basyna túsken qaraly kúnderi oryn alǵan dúrbeleńde Ózderińizge ún qatýdy azamattyq paryzym dep bilemin.
Ókinishke orai, osy kúnderi qaza tapqan azamattar az emes. Olardyń otbasylary men jaqyndaryna qaiǵyryp kóńil aitamyn. Imandary joldas bolsyn.
Sóz joq, bizdiń el ejelden eńbek pen erlikti, jiger men erikti tý etken tekti halyq. «Bas kespek bar bolsa da, til kespek joq» dep óz tilegin tilimen, sózimen jetkizgen jurt. Sondyqtan da bul kúnderi kei óńirlerde bastalǵan sherýler beibit sipatta, ádiletti talappen boldy.
Dese de, arnaiy daiyndalǵan arandatýshylar men sodyrlar jaǵdaidy paidalanyp ketti. Nátijesinde, «Táýelsizdiktiń tal besigi» sanalatyn alyp shahardy qantógistiń alańyna ainaldyrdy. Bul jái ǵana qylmys emes. Bul - jaýyzdyq! Otanǵa, Táýelsizdikke jasalǵan opasyzdyq! Qarapaiym azamattarymyzǵa jasalǵan qatigezdik!
Mundaida el bolashaǵy úshin jaýapkershiliktiń aýyr júgi Memleket basshysynyń moinynda. Al dál qazir Prezident ár azamattyń, ár otbasynyń, tutas qoǵam qaýipsizdiginiń jalǵyz kepili!
Osy oraida, men barsha qazaqstandyqtardy Memleket basshysy Qasym-Jomart Toqaevqa qoldaý kórsetýge shaqyramyn!
Biz qai jerde týyp, qai óńirde júrsek te, bir atanyń balasymyz. Qarǵa tamyrly qazaqpyz!
Men kúshti de qýatty, ásem de áleýetti memlekettiń erteńine senemin!
Aman bolaiyq! El birligi men berekesin saqtaiyq, aǵaiyn!" - dedi Tasmaǵambetov.
