Ziltemirshiler Ilia Ilin men Zýlfiia Chinshanlo úlken sportqa qaita oraldy. Olar Taldyqorǵanda jalaýyn kótergen aýyr atletikadan jeke komandalar arasyndaǵy Qazaqstan chempionatynda baq synaidy, dep habarlaidy QazAqparat tilshisi.
Doping daýyna iligip, artynsha halyqaralyq aýyr atletika federatsiiasynyń sheshimimen sporttan shektetilgen aýyr atletter úshin bul ózderin kórsetýdiń jańa bir múmkindigi. Sondyqtan bul jarysqa Ilia Ilin erekshe daiyndyqpen kelip otyr. Sportshy 102 kg salmaqta óner kórsetpek.
«Men ózimniń ziltemir kóterý stilimdi tolyq ózgerttim. Ony ózderińiz kóre jatarsyzdar. Dál qazir jańa tehnikamdy meńgerý ústindemin. Sondyqtan bárin ýaqyt kórsetedi. Men úshin ýaiymdap, maǵan qoldaý kórsetken barlyq jankúierlerime alǵysymdy bildiremin. Sizder maǵan kúsh-qýat beresizder», - dedi Ilia Ilin.
Sportshynyń basty maqsaty bul dodada jaqsy óner kórsetip, álem chempionatyna joldama alý.
Aita keteiik, Taldyqorǵan qalasyndaǵy aýyr atletikadan jeke komandalar arysyndaǵy el chempionatyna 140-tan astam ziltemirshi qatysýda. Jarys 2 qyrkúiekke deiin jalǵasady.
