Álemniń tórt dúrkin chempiony Ilia Ilin Sports True-nyń Youtube arnasyna bergen ashyq suhbatynda óziniń jalaqysy týraly aitty, dep habarlaidy QazAqparat.
«Meniń shotymda eshqandai aqsha joq. Men barlyq aqshamdy eki jyl saiahattap jumsap qoidym. Alaida men "qaiyr" surap qalǵan emespin. Meniń azdaǵan jalaqym bar. Aqshany ońdy-soldy shashýdy toqtattym. Qazir men quramadamyn, maǵan kóp eshteńeniń keregi joq. Tabysymdy otbasyma, qyzym Milananyń qajettilikterine jumsaimyn. Aqsham jetedi, onyń ústine men qazir jalǵyzbyn. Bankte jinaǵan aqsham joq, men millioner emespin, tek jalaqyǵa ǵana ómir súremin», - dedi Ilia Ilin óziniń suhbatynda.
Sondai-aq, ol óziniń jalaqysy shamamen eki myń dollar ekenin aitty.
Aita ketsek, 2008 jáne 2012 jylǵy Olimpiada oiyndarynyń nátijesi boiynsha doping paidalandy dep aiyp taǵylǵannan keiin Ilia Ilin eki jylǵa deiin sporttan shettetilgen edi. Biylǵy jyldyń maýsym aiynda sportshynyń diskvalifikatsiialaý merzimi aiaqtaldy.
Osy úzilisten keiin úlken sportqa oralǵan Ilia Ilin 2018 jylǵy Qazaqstan chempionatynyń jeńimpazy atanǵan bolatyn. Ilin 102 kelige deiingi salmaq dárejesinde Taldyqorǵanda ótken el birinshiligin jeńip aldy. Ilin 172+208 keli ziltemirlerdi julqi kóterýden Álisher Orazbek pen Eldar Sembaevty artqa tastap, eń joǵary nátije kórsetti.
