Taldyqorǵanda aýyr atletikadan el chempionaty ótedi, dep habarlaidy QazAqparat tilshisi.
QR Aýyr atletika federatsiiasynyń aqparatyna qaraǵanda, 28 tamyz ben 2 qyrkúiek aralyǵynda Taldyqorǵan qalasynyń «Jastar» sport kesheninde aýyr atletikadan erler jáne áielder arasynda QR jeke komandalyq chempionaty ótedi. Jarysqa belgili sportshylar - Olimpiada chempiondary men júldegerleri, sondai-aq álemdik jáne qurlyqtyq birinshilikterdiń jeńimpazdary qatysady. Olardyń ishinde Nijat Rahimov, Jazira Japparqul, Aleksandr Zaichikov, Denis Ýlanov, Karina Goricheva jáne basqalar bar. Sondai-aq dopingke bailanysty jarysqa qatysý quqyǵynan aiyrylǵan Ilia Ilin men Zúlfiia Chinshanlo da jarys alańyna shyǵady.
«Atalǵan týrnir osy jyldyń aýyr atletikadaǵy basty jarysy - Ashhabadta jalaýy jelbireitin álem chempionatynyń negizgi irikteý kezeńi bolmaq. Taldyqorǵan taqtaituǵyryna ulttyq qurama komandanyń barlyq múshesi tegis shyǵady. Árine, olardyń árqaisysy álem chempionatyna barýdy kózdeidi. Sondyqtan sportshylarymyz óz babynyń qandai ekenin qarashada tekseretin bolady. Taldyqorǵanda rekordtar kóp bola qoimas dep oilaimyn, sebebi Ashhabadqa deiin áli úsh jattyǵý jiyndary bar. Ziltemirshilerimiz sol jiyndarda óz baptaryna kelýi tiis. Alaida Jetisý jerindegi chempionat qyzyqty óterine kúmánim joq» - deidi QR UQK bas bapkeri Iýrii Melnikov.
Aita keteiik, Qazsport telearnasy jarystan tikelei transliatsiia júrgizýdi júzege asyrady.
