Aýyr atletikadan tórt dúrkin álem chempiony Ilia Ilin Shymkent qalasy sport basqarmasynyń basshysy, eki azamattyǵy bar Oleg Pochivalovqa arasha tústi. Qazaqstanda Polchivalov sekildi mamandardyń az ekenin aityp, oǵan ekinshi múmkindik berýdi surady, dep habarlaidy "Ult aqparat".
"Oleg Pochivalovty qurmetteimin. Menińshe, adam ózge eldiń azamattyǵyn alǵan bolsa, Qazaqstanda turyp, jumys istemei, baiaǵyda-aq sol elge ketip qalar edi. Elimizdegi bilikti sport mamandaryn saqtap qalýǵa tyrysý qajet, óitkeni bizde mundai maman kóp emes. Eger ol kiside Resei azamattyǵy bolmasa, Oleg Pochivalovqa óńirdegi sportty damytýdy jalǵastyrýǵa múmkindik berý kerek", - dep jazdy sportshy áleýmettik jelidegi paraqshasynda.
Aita keteiik, Shymkent sport basqarmasynyń basshysy Oleg Pochivalov Qazaqstan men Resei azamattyǵyn alǵany 2020 jyldyń sońynda belgili boldy. Sol kezde sport basqarmasy bul málimetti joqqa shyǵarǵan.
Keiinnen basqarma basshysynyń qos azamattyǵy bar ekeni anyqtalyp, ol Qazaqstan azamattyǵynan aiyryldy.
"Azamattyq týraly" zańnyń 21-babyna sáikes, kóshi-qon qyzmeti basqarmasy Oleg Vladimirovich Pochivalovtyń Qazaqstan azamattyǵynan aiyrylý faktisin tirkedi", - dep habarlady Shymkent qalalyq politsiia departamentiniń kóshi-qon jáne azamattyq bólimi mamandary.
Sodan keiin sheneýnik kóshi-qon politsiiasynyń sheshimin sotqa berdi, alaida bul protseste jeńildi.
