Foto: Instagram.com
Qyzylordalyq aýyr atletshi, álem chempionatynyń kúmis júldegeri Almas Óteshov «Ýaqyt kórsetedi» YouTube arnasyna suhbat berip, búginde Almatyda kúzetshi qyzmetin atqaryp júrgenin jasyrmady. Onyń aitýynsha, mundai kúige túsýine doping daýy áser etken. Ol sportshylardyń doping ishetini ras ekenin, oǵan sport salasyndaǵy basshylardyń ózderi múddeli ekenin jasyrmai áńgimeledi.
«Propionat, testosteron, stanozolol siiaqty garmonaldy preparattardyń bárin ishtik. Ony ishpeseń kótere almaisyń. Taza aǵzam 200 keliden artyq kóterýge shamasy jetpeidi. Dopingtiń kómegimen 230 kelige deiin bolady», - deidi Almas Óteshov.
Óteshov qazir túrmede otyrǵan eks-ministr Talǵat Ermegiiaov Halyq aýyr atletika federatsiiasymen tyǵyz jumys istegenin aitty. Uzaq ýaqyt osy uiymdy basqarǵan majarstandyq Tamash Aianmen óte jaqsy qarym-qatynasta bolypty. Eger Ermegiiaev túrmege túspegende Qazaqstan aýyr atletikasy mundai aianyshty halge túspes edi, deidi ol.
«Dári-dármektiń bárin ózimiz jaidan-jai ishpeimiz. Bizde meditsinalyq shtab, bas bapker, aǵa bapker bar, solar beredi», - deidi sportshy.
Ol osy rette Ilia Ilin qanshama marapat pen ataqqa bólenip, alǵan qarjysy men páterin nege qaitarmaidy degen suraqqa jaýap berdi.
«Meniń de úsh bólmeli páterim bar. Men nege qaitarýym kerek? Bile bilsek, Úkimet bizdi de paidalandy. Halyqaralyq arenada tý kóterdik. Ishkizetinin ishkizdi, salatynyn saldy. Dári-dármektiń bárin Qytai nemese Resei ákelip bergen joq. Ózimizdiń Úkimet usyndy. Bárin búldirip júrgenniń biri – eks-bapker Aleksei Ni. Ustap alyp, sottaý kerek. Bárine kináli sol. Qazir Qazaqstanda joq. Bizge 2006 jyly 30 mln dollarym bar dep maqtanatyn», - deidi Almas Óteshov.
