Foto: Maqsat Jaqaýdyń facebook paraqshasynan
Saiasattanýshy Maqsat Jaqaý memleket basshysy Qasym-Jomart Toqaevtyń qosymsha qun salyǵy týraly aitqan sózin mysalǵa keltirip, pikir bildirdi, dep habarlaidy Ult.kz.
«Búgin otandyq kásipkerlermen kezdesken Prezident Q.Toqaev qosymsha qun salyǵyn, iaǵni NDS-ty kóteremiz degenderge shúilikti. 20 paiyzdyq qun salyǵy el ekonomikasyna ziian ekenin jetesine jetkizgendei...
Naqtyraq aitsaq, 20 paiyz NDS-tiń qandai zardaby bolady?
Birinshiden, ekonomikaǵa shekten tys salmaq. Taýarlar men qyzmet qymbattamaq, halyqtyń satyp alý qabileti tómendemek. Bul naqty áleýmettik kúizeliske sebep.
Ekinshiden, NDS-tiń ósýi tabysty jasyratyn kásipkerlerdiń kóbeiýine ákelmek. Kóleńkeli ekonomika sharyqtaidy. Biýdjetti osylai qampaitamyz dep, jinalatyn salyq mólsheri azaiady, jemqorlyq kóbeimek. Buny túsiný úshin, ekonomist bolýdyń qajeti joq. Bunda, Qasym-Jomart Kemelulynyń 20 paiyz kóp deýiniń sebebi osy. Artyq qylyp, tyrtyq qylmaýdyń qamy...
Sondyqtan, Úkimetke salyq tóleminiń balama jolyn qarastyrǵan jón. Turmysqa kerek taýar men qyzmetti qosylǵan qun salyǵynan bosatsa, al qymbat, «roskoshnyi» taýar men qyzmetke qun salyǵyn kóbeitse, áleýmettik ádilettilik bolar edi.
Prezident aitty, bitti. NDS 20 paiyzǵa óspeitin boldy. Endi, jańa usynystardy kúteiik, tek osy joly praktik kásipkerlerdi, maman-sarapshylardy tartyp, ortaq sheshimdi Úkimet birge jasar dep úmittenemiz. Ilegenimiz bir teriniń pushpaǵy ǵoi...», ‒ dedi Maqsat Jaqaý facebook paraqshasynda jazǵan jazbasynda.
