«Tsifrly Qazaqstan» memlekettik baǵdarlamasy aiasynda Ile-Alataý ulttyq tabiǵi parkiniń baqylaý-ótkizý beketi elektrondy formatqa kóshedi.
Almaty qalasy ákimi Baqytjan Saǵyntaev buǵan deiin demalys ornyndaǵy qolma-qol tólem jasaý júiesin tolyqtai elektrondy formatqa aýystyrý qajettigin aitqan bolatyn.
Búginde ekologiialyq bekette 10 inspektor jumys isteidi. Olar demalys ornyna kelýshi qala qonaqtarymen qolma-qol tólem arqyly eseptesedi. Endigide bul jumys protsessi avtomattandyrylǵan júieniń kómegimen oryndalady.
Demalýshylar týristik saiahat jolyn tańdasa, 452 teńge 50 tiyn tóleidi. Eger kafe, meiramhana, taý-spadan qaitatyn bolsa, 252 tiyn 50 tiyn kóleminde qolma-qol tólem jasaidy. Sol sebepti bilet alý kezinde demalýshydan qaida baratyndyǵy aldyn-ala suralady eken. Bul týraly Ile-Alataý memlekettik ulttyq tabiǵi parkiniń inspektory Qaiyrjan Jylqybaev aityp berdi.
Qazirgi tańda ekologiialyq bekette eki terminal ornatylǵan. Olar aldaǵy ýaqytta tolyqtai iske qosylady. Odan bólek, «Ońai» tólem kartalary arqyly tóleý múmkindigi de qolǵa alynbaq. Bul kóleńkeli aqsha aýdarymdarynyń aldyn alýǵa óz septigin tigizedi.
Ile-Alataý memlekettik ulttyq tabiǵi parki ekologiialyq aǵartý jáne týrizm bóliminiń basshysy Tilek Ádiljanov parkke kirý tólemin elektrondyq júiege kóshirý máselesi birneshe jyldan beri kóterilip kele jatqanyn aitady.
Aita ketsek, ótken jyly taý bókterine demalýǵa kelgen halyqtyń sany 120 myńǵa jetken. Olar arnaiy demalys ornyna kirgeni úshin bekettegi baqylaýshylarǵa 52 mln teńge kóleminde qolma-qol tólem jasaǵan. Sondai-aq demalys ornyna jumys kúnderi 200 demalýshy kelse, senbi men jeksenbi kúnderi olardyń qatary 6 esege arttady. Mundai jaǵdaida tekserý beketinde uzyn-sonar kezekke turý kórinisi jii kezedesedi.
Tekserý beketi tolyqtai elektrondy formatqa aýysqan kezde demalys aimaǵyna kirýde kezek kútý jáne ýaqyt joǵaltý máseleleri azaiady.
