Qazirgi tańda Qaraǵandy, Aqmola, Qostanai, Pavlodar jáne Soltústik Qazaqstan oblystarynda jaǵdai kúrdeli, osy óńirlerde, sondai-aq Shyǵys Qazaqstan oblysynda aýa raiyna bailanysty daýyldy eskertý jariialandy. Osyǵan orai, jergilikti atqarýshy organdar kez kelgen jedel sharalar qabyldaýǵa daiyn bolýlary kerek. Úkimet otyrysynda Ishki ister ministri Qalmuhanbet Qasymov osylai aitty, dep habarlaidy Baq.kz tilshisi.
Premer-ministr Baqytjan Saǵyntaev ishki ister ministrinen Shyǵys Qazaqstan oblysyndaǵy jaǵdai men sý tasqynynan zardap shekken aýdan turǵyndarǵa kómek qalai kórsetilip jatqanyn surady.
«Ótken otyrysymyzda kóterilgen másele - tótenshe jaǵdai qyzmetkerleriniń qajetti qural-jabdyqtarmen tolyq qamtamasyz etilmeýi. Qalmuhanbet Nurmuhanbetuly, osy boiynsha málimet berińiz», - dedi Úkimet basshysy.
Qalmuhanbet Qasymovtyń aitýynsha, respýblika boiynsha barlyǵy 50 eldi mekende 1500-den asa úidi sý basyp, 3800-den asa adam kóshirilgen. Sýdyń tasý sebebi - aýa raiynyń kúrt jylynyp, jaýyn-shashynnyń normadan 3 ese kóp túsýi. Qabyldanǵan sharalardyń arqasynda 1100-den asa úi sýdan bosatylyp, 2700-den astam adam úilerine oralǵan.
«Shyǵys Qazaqstan oblysynyń jaǵdaiy asa kúrdeli. Qazirgi tańda onda 396 úi men 185 aýla sý astynda qalyp otyr. Osyǵan bailanysty Semei qalasynda, Aiagóz, Zyrian jáne Shemonaiha aýdandarynda jergilikti aýqymdy tótenshe jaǵdai jariialandy. Apattyq-qutqarý jáne kezek kúttirmeitin jumystardy jasaýǵa 1 myńnan asa adam, 200 birlik tehnika, 96 motopomp jáne 10 qaiyq qatysýda. Memlekettik-materialdyq rezervten Shyǵys Qazaqstan oblysyna 8 birlik tehnika jáne jyljymaly elektr stantsiialary berildi», - dedi Qasymov.
Ministrdiń aitýynsha, qazirgi tańda Qaraǵandy, Aqmola, Qostanai, Pavlodar jáne Soltústik Qazaqstan oblystarynda da jaǵdai kúrdeli, osy óńirlerde, sondai-aq Shyǵys Qazaqstan oblysynda aýa raiyna bailanysty daýyldy eskertý jariialandy. Osyǵan orai, jergilikti atqarýshy organdar kez kelgen jedel sharalar qabyldaýǵa daiyn bolýlary kerek.
«Baqytjan Ábdiruly, sizdiń tapsyrmańyz boiynsha keshe Asqar Uzaqbaiuylynyń (Mamin - premer-ministr orynbasary - avt.) tóraǵalyǵymen azamattyq qorǵaý bólimsheleriniń materialdyq-tehnikalyq jabdyqtalýy máseleleri týraly keńes ótti. Negizi bul másele biraz jyldan beri qarajattyń azdyǵynan sheshilmei kele jatyr. Búgingi kúni qutqarý qyzmetterin tehnikalyq qamtamasyz etý 30 paiyzdan aspaidy. Shyǵys Qazaqstan, Soltústik Qazaqstan, Qostanai oblystary, Astana qalasy biýdjetterinen atalǵan baǵytqa qarajat óte az bólindi. Dál osy kezeńde bizge 4 mlrd teńgeden astam qarjy kerek. Osyǵan qatysty tiisti esepter men negizdemeler daiyndaimyz», - dedi Qalmuhanbet Qasymov.
Eske salsaq, búgin Úkimet otyrysynda premer-ministr Shyǵys Qazaqstan oblysyna shuǵyl túrde qarjy bólýdi tapsyrǵan bolatyn.
