Zańsyz jiyndar men mitingiler kezinde ustalǵan keibir azamattar qylmystyq qýdalaýǵa ushyraǵan joq. Bári úilerine jiberildi. Bul týraly ishki ister ministriniń orynbasary Arystanǵani Zapparov málimdedi, dep habarlaidy Sputnik Qazaqstan.
Ol búgin, 10 qańtar – sailaý kúni keibir qalalarda zańsyz jiyndar men mitingiler uiymdastyrý, oǵan qatysý jáne úgitteý faktileri tirkelgenin atap ótti. Jergilikti atqarýshy organdar, prokýratýra qyzmetkerleri azamattarǵa aktsiianyń zańsyz ekenin birneshe ret eskertip, toqtatý qajettigin túsindirgen.
"Keibir azamattar memlekettik bilik ókilderiniń zańdy talaptaryn oryndaýdan bas tartty. Olardy qyzmetkerlerimiz politsiia beketterine jetkizýge májbúr boldy. Olar profilaktikalyq áńgimelesýden keiin úilerine jiberildi. Eshqaisysy da ákimshilik nemese qylmystyq qýdalaýǵa ushyraǵan joq. Jalpy elimizde qazirgi ýaqytta jaǵdai turaqty", - dedi Zapparov Ortalyq kommýnikatsiialar qyzmetinde ótken brifingte.
Sondai-aq, ol daýys berý kezinde sailaý ýchaskelerinde aitarlyqtai zańbuzýshylyqtar tirkelmegenin málimdedi.
Karantin kúsheitilgen keibir qalalarda sailaý komissiialarynyń tóraǵalary akt toltyrdy. Oǵan sáikes, sanitarlyq shekteýlerdi buzǵany úshin jáne komissiia jumysyna kedergi keltirip, sailaý ýchaskelerinde bolý tártibin saqtamaǵany úshin 10 baqylaýshy ǵimarattan májbúrli túrde shyǵaryldy.
Zapparovtyń aitýynsha, qazir politseiler kúsheitilgen rejimde jumys istep jatyr. Olar qoǵamdyq tártipti saqtaýmen qatar, sailaý ýchaskelerindegi biýlletender men hattamalardyń aýdandyq, oblystyq komissiialarǵa esh kedergisiz jetkizilýin qamtamasyz etedi.
