Foto: Polisia.kz
IIM uiymdasqan qylmysqa qarsy kúres departamenti Ulttyq qaýipsizdik komitetimen birlesip, prokýratýranyń úilestirýimen quramyna Qazaqstannyń jáne jaqyn shet elderdiń azamattary kirgen transulttyq qylmystyq toptyń jolyn kesti, – dep habarlaidy "Ult aqparat" Polisia.kz portalyna silteme jasap.
Olar modeldik agenttiktiń atyn jamylyp, pornografiialyq materialdardy daiyndaýmen jáne taratýmen ainalysqan. Máselen, qylmystyq toptyń músheleri uzaq ýaqyt boiy áleýmettik jeli arqyly 2 mln teńgege deiin ai saiynǵy tólemdi ýáde etip, 18-den 25 jasqa deiingi qyzdardy tartqan. Qyzdar atalǵan qyzmetten bas tartqan jaǵdaida qylmyskerler olarǵa psihologiialyq qysym kórsetip, aiyppul salǵan.
Toptyń ishinde naqty rólderi belgilengen uiymdastyrýshylar, basshylar, azǵyryp kóndirýshiler, ákimshiler, IT-mamandar men býhgalterler bolǵan. Anyqtalǵandai, qylmystyq toptyń qarajat ainalymy sońǵy bes jylda 3 mlrd teńgeden asady.
Politsiia qyzmetkerleri Astana, Almaty, Shymkent, Aqtóbe jáne Qaraǵandy qalalarynda qyzdardyń intimdi videolaryn táýlik boiy kórsetýge arnalǵan 79 keńse men páter anyqtaǵan.
Arnaiy operatsiia barysynda atalǵan qalalarda bir ýaqytta 138 tintý júrgizilip, 80-nen astam kompiýterlik jabdyq, shamamen bir kilogramm esirtki quraly jáne 69 myńnan astam AQSh dollary tárkilengen.
"Politsiiaǵa barlyǵy 118 adam jetkizilip, qylmystyq toptyń 13 negizgi uiymdastyrýshysy, onyń ishinde úsh shetel azamaty ýaqytsha ustaý izoliatoryna qamaldy.
Qazirgi ýaqytta IIM tergeý departamenti transulttyq qylmystyq top qurý, oǵan basshylyq etý jáne qatysý faktisi boiynsha sotqa deiingi tergep-tekserý júrgizip jatyr.
Qylmystyq toptyń negizgi múshelerine múlki tárkilenip, 20 jylǵa deiin bas bostandyǵynan aiyrý jazasy qarastyrylady, – dedi IIM uiymdasqan qylmysqa qarsy kúres departamentiniń basqarma bastyǵy Qýandyq Alpys.
video: Polisia.kz
