Ishki ister ministrliginiń resmi ókili Nurdildá Oraz onlain brifingide politsiia qyzmetkerleriniń ústinen túsken shaǵymdar týraly málimet berdi, dep habarlaidy QazAqparat.
«IIM «senim telefony» keń aýqymdy máseleler boiynsha halyqpen keri bailanystyń turaqty arnasyna ainaldy. Ótken 17-23 qańtar aralyǵynda ǵana 544 habarlama kelip tústi. Onyń ishinde 448 habarlama konsýltativtik-anyqtamalyq sipatta boldy. Habarlamanyń árqaisysyna túsiniktemeler, usynymdar berilip, qalyptasqan mán-jailardy sheshýdiń joldary usynyldy», - dedi Nurdildá Oraz.
Onyń aitýynsha, politsiia qyzmetkerleriniń áreketterine birneshe sipattaǵy shaǵymdar túsken. Azamattardy ustaý jáne jetkizýdiń 46 faktisi boiynsha shaǵym kelgen. Onyń ishinde ustalǵan týystaryn izdegen 18 ótinish túsken.
«Árbir ótinish berýshige ustaýdyń sebepteri, zań buzýshylyqtyń máni jáne qamaýdaǵy týysymen bailanysý tásilderi túsindiriledi. Uialy telefondardy tekserýdiń 28 faktisi boiynsha shaǵym keldi. QR Qylmystyq kodeksiniń 255-baby, (terrorizm aktisi), 269-baby (ǵimarat pen qurylysqa shabýyl), jáne 272-baby (jappai tártipsizdik) baby boiynsha sotqa deiingi tergeý aiasynda barlyq telefondar tárkilengeni anyqtaldy. Ruqsat etilgen tekserýden keiin olardyń múlki qaitarylatyny habarlandy», - dedi Ishki ister ministrliginiń resmi ókili.
Aitýynsha, joǵaryda atalǵan ár fakti boiynsha qyzmettik tergeýler júrip jatyr.
«IIM «senim telefonyna» kelip túsken habarlamalardy qaraýdyń merzimi 3-6 saǵattan aspaidy. Tekserý úshin ýaqytty qajet etetin jekelegen máseleler boiynsha azamattarǵa tirkeý boiynsha qabyldanǵan birinshi kezektegi sharalar týraly, sondai-aq tekserý nátijeleri qashan aitylatyny túsindiriledi», - dep túsindirdi Nurdildá Oraz.
