Ishki ister ministrligi eki kúnniń ishinde ustalǵan adamdardyń naqty sanyn jariialady, dep habarlaidy Sputnik Qazaqstan tilshisi.
"Mitingiler bolǵan birinshi kúni 500 adam ustalǵan edi. Onyń ishinde 400 adam jaýapkershilikke tartyldy. Al ekinshi kúni shamamen 200 adam ishki ister organdaryna jetkizildi. Olardyń arasynda 150-ge tarta adam jaýapkershilikke tartyldy", - dedi minstrliktiń resmi ókili Nurdildá Oraz.
Onyń aitýynsha, Nur-Sultan men Almaty qalalarynda bolǵan mitingilerdi "Qazaqstannyń demokratiialyq tańdaýy" ekstremistik uiymynyń (Qazaqstanda tyiym salynǵan) jaqtastary uiymdastyrǵan.
"Olar áleýmettik jeliler men basqa da buqaralyq aqparat quraldary arqyly qarapaiym adamdardy sherýge shyǵaryp, tártipbuzýshylyqqa itermeledi. Sonyń saldarynan bizdiń úsh qyzmetkerimiz jaraqat aldy. Ekeýine tas tidi. Bireýiniń kózine gaz balonyn shashty”- dep atap kórsetti Oraz.
Mitingiler kezinde ustalǵan azamattarǵa qatysty ákimshilik hattama rásimdelgen. Al keibir adamdar profilaktikalyq sharadan keiin úiine jiberilipti.
Ministrliktiń resmi ókili ustalǵandardy Qaraǵandy qalasyna deiin aparyp tastaý máselesin de túsindirdi.
"Endi, bunyń barlyǵy ishki ister organdarynyń quziretinde, iaǵni sottyń úkimimen sheshilgen. Zańdy qarasańyzdar bolady, ishki ister organdary ustalǵandardy qai jerge ornalastyratynyn ózderi sheshedi”, - dedi Oraz jýrnalisterge bergen suhbatynda.
Eske sala ketsek, keshe, 10 maýsym kúni baspasóz máslihaty kezinde Qasym-Jomart Toqaev sherýge shyqqandarmen dialog ornatýǵa daiyn ekenin aitqan bolatyn.
"Men narazylyq sherýine shyqqandarǵa dialog formasyn usyný qajet dep sanaimyn. Buǵan deiin qoǵamdyq senim komiteti qurylatynyn aitqan edim, onyń quramyna bizdiń qoǵamnyń túrli toptarynyń ókilderi kiredi, onda pikir almasatyn bolamyz. Meniń pozitsiiam týraly qoǵamda ártúrli pikir bolýy múmkin, biraq biz birtutas ultpyz. San pikir – birtutas ult", - dedi ol.
