Ishki ister ministri Erlan Turǵymbaevtyń aitýynsha, elde adam saýdasyna qatysty 107 qylmys tirkelgen, dep habarlaidy QazAqparat.
«Adam saýdasyna qatysty qylmysty tergeý tájiribesi jetildirilip keledi. Jyl basynan beri elde mundai sanatta 107 qylmys tirkeldi. Sotqa 58 qylmystyq is joldandy. Kóp jaǵdaida bul qylmystar uiymdasqan jáne transulttyq sipatqa ie. Osyǵan bailanysty uiymdasqan qylmysqa qarsy kúres departamentin quryp, onyń qurylymynda adam saýdasymen kúres basqarmasyn ashý kózdelip otyr», - dedi Erlan Turǵymbaev Memleket basshysynyń Qazaqstan halqyna joldaýynda aitylǵan tapsyrmalaryn iske asyrý barysy týraly ótken baspasóz máslihatynda.
Eske sala ketsek, buǵan deiin Memleket basshysy Qasym-Jomart Toqaev adam saýdasyna qatysty máselege jeke toqtalyp, bul baǵytta tirkeletin qylmystardy anyqtaý úshin naqty sharalardy qabyldaýdy tapsyrǵan bolatyn.
«Adam quqyǵyn qorǵaý – kún tártibinde . Bul másele boiynsha turaqty túrde jumys júrgizýimiz kerek. Bul adam saýdasymen kúreske de qatysty. Bul rette sheshilmei jatqan másele kóp. Tipti jaǵdai kúrdeli dep te aitýǵa bolady. Adam saýdasy týraly halyqaralyq reitingter men baiandamalarda Qazaqstannyń jaǵdaiy onsha emes. Men bul máselege Joldaýda jeke toqtaldym. Endigi kezekte barlyq ýákiletti organdardyń batyl ári úilesimdi áreketi kerek. Qazaqstannyń zańnamasyn halyqaralyq standarttarǵa sai beiimdegen abzal», - dedi Prezident Ulttyq qoǵamdyq senim keńesiniń otyrysynda.
