IIM-de koronavirýstyq infektsiiadan qorǵaý quraldary tanystyryldy, dep habarlaidy "Ult aqparat" Polisia.kz silteme jasap.
Tótenshe jaǵdai rejimi engizilgen alǵashqy kúnnen bastap meditsina qyzmetkerlerimen birge halyqtyń densaýlyǵyn qorǵaý baǵytynda politseiler men áskeri qyzmetshiler de qyzmet atqaryp jatyr.
Olar blok-beketterde jumys istep, qoǵamdyq tártipti kúzetedi, karantindik aimaqtarda juqtyrý oshaqtaryn oqshaýlaý boiynsha arnaiy is-sharalar júrgizedi. Sanitarlyq erejelerdi buzý áreketteriniń jolyn kesedi, áleýetti juqtyrýshylar jáne olarmen bailanysta bolǵandardy izdeidi.
Qyzmetke kiriskende «qaýiptiligi joǵary toptarymen» jumys istei otyryp, meditsina qyzmetkerleri siiaqty, olar da ózderine juqtyrý qaýpimen betpe-bet keledi. Osyǵan bailanysty, IIM basshysynyń tapsyrmasy boiynsha qylmystyq-atqarý mekemeleriniń barlyq tigin tsehtarynda ishki ister organdarynyń qyzmetkerlerine arnalǵan qorǵanys quraldaryn tigý júrgizilip jatyr. Máselen, birinshi kezeńde meditsinalyq maskalardy tigý óndirisi jolǵa qoiyldy, 1 000 000-ǵa jýyq qorǵanys buiymdary daiyndaldy, bul jeke quramnyń qorǵanys quraldaryna degen qajettilikterin tolyǵymen jabýǵa múmkindik berdi. Sonymen qatar, politsiia qyzmetkerlerine arnalǵan arnaiy kostiýmder óndirisi bastaldy. Qorǵanysh kombinezon – kóp ret qoldanylatyn, ol sý ótkizbeitin áseri bar qospaly matadan jasalǵan. Qylmystyq-atqarý júiesi mekemelerinde qysqa merzimde óndirisi jolǵa qoiylǵan buiymdardyń jańa túri qorǵaýdyń qosymsha quraly bolyp tabylady. 160 qorǵanys kombinezonynan turatyn birinshi partiiany blok-bekette qyzmet atqaratyn elordalyq politseiler aldy. Jaqyn arada qorǵanys kombinezondarymen IIM-niń barlyq aimaqtyq bólimsheleri qamtamasyz etiledi. Birinshi kezekte olardy karantindik is-sharalarǵa tartylǵan qyzmetkerler alady.
«Kún saiyn 25 myńǵa jýyq politsei, qutqarýshylar jáne Ulttyq ulannyń áskeri qyzmetshileri jasaqpen kúzetke shyǵady. Osy qiyn jaǵdailarda penitentsiarlyq júie óziniń tiimdiligin kórsetti. Meniń tapsyrmam boiynsha Qylmystyq-atqarý júiesi komitetiniń «Eńbek» RMK ázirlegen quraldar tótenshe jaǵdai kezinde óz qyzmettik boryshyn táýlik boiy oryndaityn qyzmetkerlerimizdiń densaýlyǵyn qorǵaýdy qamtamasyz etýge múmkindik beredi», – dedi Ishki ister ministri Erlan Turǵymbaev.
Budan basqa, QAJK basshylyǵy «dezinfektsiialyq tonnel» dep atalatyn qorǵanys quralynyń tusaýkeserin ótkizdi. Birinshi eksperimenttik úlgi Ishki ister ministrliginiń ǵimaratyna kire beriste ornatylǵan. Tonnel qurylymy qarapaiym: ol dezinfektsiialyq qasieti bar arnaiy fizertindini búrký quralymen jabdyqtalǵan. Mundai pýnktter QAJ mekemelerinde koronavirýstyq infektsiianyń taralýynyń aldyn alý maqsatynda barlyq koloniialarda ornatylady.
