QR ishki ister ministriniń orynbasary Rashid Jaqypov vedomstvo basshysy Qalmuhanbet Qasymovtyń Denis Tenniń ólimine qatysty isti tergeý týraly baspasóz máslihatyna nege qatyspaǵanyn túsindirdi, dep habarlaidy Sputnik Qazaqstan tilshisi.
"Ministrdiń otstavkaǵa ketý máselesi ishki ister ministrliginiń quzyretinde emes. Sondyqtan bul suraqqa tolyq jaýap bere almaimyn. Al ministr nege baspasóz máslihatyna qatyspady degenge qatysty aitar bolsam, ol qyzmettik issaparda júr. Issapardan oralǵannan keiin sizdermen, jurtshylyqpen kezdesip, suraqtaryńyzǵa jaýap beredi dep oilaimyn", — dedi Jaqypov.
Eske sala ketsek, qazaqstandyq mánerlep syrǵanaýshy, Sochi Olimpiadasynyń qola júldegeri Denis Ten 19 shilde kúni Almatyda avtokólik urylarynyń qolynan qaza tapty. Sportshy turaqta turǵan kóliginiń ainasyn urlamaq bolǵan qaskóilerdiń ústinen túsken. Arada janjal shyǵyp, saldarynan kúdiktiler Denis Tenge pyshaq suǵyp alady.
Sportshy 3 litr qan joǵaltqan. Dárigerler 2,5 saǵat boiy onyń ómiri úshin kúreskenmen, ajaldan arashalap qala almady. Denis Ten 17:30-da aýrýhanada jan tapsyrdy.
Atalǵan faktige qatysty qylmystyq is qozǵaldy. QR prezidenti Nursultan Nazarbaev bas prokýror men ishki ister ministrine istiń jiti jáne obektivti tergelýin qamtamasyz etýdi tapsyrdy.
20 shilde kúni tańerteń mánerlep syrǵanaýshynyń ólimine kúdikti Nuraly Qiiasov ustaldy. Ol Jambyl oblysynyń týmasy, 24 jasta. Sol kúni keshke ekinshi kúdikti Qyzylorda oblysynyń týmasy Arman Qudaibergenov ustaldy.
Al búgin Denis Tenniń ólimine qatysty tyń derekter shyqty. Almaty IID aqparatynsha, oqiǵany kózben kórgen adamdar tabylǵan. Betpe-bet kezdesý barysynda Nuraly Qiiasov Denis Tenge pyshaq suqqanyn moiyndady. Buǵan deiin Arman Qudaibergenov pyshaq jaraqatyn salǵanyn aitqan edi. Eki kúdikti de buryn zańdy buzǵan.
