Foto: Polisia.kz
Qazaqstanda kámeletke tolmaǵandardy esirtki ainalymyna tartý faktileri kóbeiip barady, dep habarlaidy Ult.kz.
Ishki ister ministrligi «Zań men tártip» qaǵidasy aiasynda esirtkiniń zańsyz ainalymyna qatysty qylmystardy anyqtaý jáne jolyn kesý jumystaryn jalǵastyryp keledi. Ásirese jasóspirimder men jastar arasyndaǵy aldyn alý sharalaryna erekshe nazar aýdarylýda.
Ministrlik málimetinshe, biyldyń ózinde 17 myńǵa jýyq esirtkige qarsy is-shara uiymdastyrylyp, 2 millionnan astam jasóspirim men jastar qamtylǵan.
Degenmen qabyldanyp jatqan sharalarǵa qaramastan, esirtki tasymaly men saqtaýǵa tartylǵan kámeletke tolmaǵandardyń sany ósip otyr.
Mysaly:
-
Abai oblysynda kolledjdiń birinshi kýrs stýdenti, kámeletke tolmaǵan qyz psihotroptyq zattardy asa iri kólemde saqtaǵany úshin ustaldy. Tintý kezinde odan 16 gramm sintetikalyq esirtki tárkilendi.
-
Shyǵys Qazaqstan oblysynda taǵy bir jasóspirim ustaldy. Ol Almatydan Óskemenge baryp, internet-dúken arqyly tyiym salynǵan zattardy jetkizýshi retinde jumys istegen. Ustaý kezinde odan 3 gramm α-PVP sintetikalyq esirtki alynǵan.
Búgingi tańda respýblika boiynsha esirtki qylmysyna tartylǵan 60-tan astam jasóspirim ustaldy.
IIM ata-analardy balalarynyń kimmen aralasatynyn, qandai áleýmettik jeliler men messendjerlerdi paidalanatynyn baqylaýǵa shaqyrdy. Sebebi keibir internet-resýrstar “qashyqtan jumys” nemese “jeńil tabys” túrinde jarnamalanyp, shyn máninde zańsyz áreketterge itermeleidi.
Ministrlik eske salady:
-
esirtki jáne psihotroptyq zattardy satqandarǵa qylmystyq jaýapkershilik, tipti ómir boiyna bas bostandyǵynan aiyrý jazasy qarastyrylǵan;
-
al kámeletke tolmaǵandardyń quqyq buzýshylyq áreketteri ata-analardyń salǵyrttyǵynan týyndasa, ata-analyq jaýapkershilikti qatańdatý josparlanýda.
IIM «Zań men tártip» qaǵidasyn dáiekti túrde júzege asyryp, azamattardyń, ásirese balalardyń ómiri men densaýlyǵyn qorǵaý jumystaryn jalǵastyratynyn málimdedi.
