Ishki ister ministrliginiń Tergeý departamenti qylmystyq isterdi tergeý barysynda zańdylyqty qamtamasyz etý, azamattardyń quqyqtaryn qorǵaý jáne jábirlenýshilerge keltirilgen shyǵyndy óteý baǵytyndaǵy jumystardyń nátijesin jariialady, dep habarlaidy ult.kz.
IIM Tergeý departamentiniń bastyǵy Samat Aisovtyń aitýynsha, jyl basynan beri tergelip jatqan qylmystyq ister aiasynda memlekettik organdarǵa, mekemeler men uiymdarǵa 45 myńǵa jýyq usynys engizilgen.
Qoǵamdyq qaýipsizdik qalai kúsheitildi?
Usynystardy qaraý nátijesinde:
- áleýmettik qolaisyz aýdandarda, saýda jáne oiyn-saýyq oryndarynda 2 myńǵa jýyq beinebaqylaý kamerasy ornatyldy;
- 155 qaýipti jol ýchaskesinde jaryqtandyrý, baǵdarshamdar, jol belgileri men tańbalar jańartyldy;
- 56 nysanda qaýipsizdik sharalary kúsheitilip, kúzet júieleri jańǵyrtyldy;
- bilim berý uiymdarynda 60-tan astam profilaktikalyq is-shara ótkizildi.
Qandai sharalar qabyldandy?
- Qaita qylmys jasaǵan 8 shartty túrde sottalǵan azamat bas bostandyǵynan aiyrý oryndaryna jiberildi;
- zańsyz qyzmetpen ainalysqan 4 sýbektiniń jumysy toqtatyldy;
- 15 kafe men túngi klýbtyń jumys ýaqyty shekteldi.
Naqty mysaldar
Pavlodar qalasynda biyl qańtar aiynda bolǵan buzaqylyq oqiǵasynan keiin laýndj-barlardyń biriniń qyzmeti toqtatyldy.
Al Qaraǵandy oblysyndaǵy Aqsý-Aiýly – Balqash tas jolynda jolaýshylar avtobýsy órtenip, kámeletke tolmaǵan balanyń qaza bolýyna bailanysty barlyq jolaýshylar avtobýstaryna tekserý júrgizildi.
Nátijesinde:
- 199 júrgizýshi men avtobýs iesi ákimshilik jaýapkershilikke tartyldy;
- olardyń 55-i avtobýs salonyn ruqsatsyz jatyn orynǵa qaita jabdyqtaǵany úshin jaýapqa tartylǵan.
Laýazymdy tulǵalar jaýapqa tartyldy
Usynystardy qaraý qorytyndysynda:
- qylmystyń jasalýyna yqpal etken áreketsizdigi úshin 2 myńnan astam laýazymdy tulǵa tártiptik jaýapkershilikke tartyldy;
- usynystardy ýaqytyly qaramaǵany úshin 500-den astam adam ákimshilik jaýapkershilikke tartylǵan.
Jábirlenýshilerge keltirilgen shyǵyn qalai ótelip jatyr?
Aiaqtalǵan qylmystyq ister boiynsha:
- keltirilgen jalpy shyǵyn – 72 mlrd teńgeden astam;
- ótelgen soma – 34 mlrd teńgeden astam.
Mysaly, Astanada 111 adam internet-alaiaqtyqtyń qurbany bolǵan is boiynsha 140 mln teńgeden astam shyǵyn tolyq óteldi.
Shyǵyndy óteýdi qamtamasyz etý úshin jalpy quny 29 mlrd teńgeden asatyn múlikke tyiym salyndy.
Sonyń ishinde Almaty oblysynda alaiaqtyq isi boiynsha eki JShS-niń jalpy quny 7 mlrd teńgeden asatyn 28 jyljymaityn múlik nysanyna arest qoiyldy.
Ótemaqy qorynyń jumysy
Jábirlenýshilerge ótemaqy qory arqyly:
- 124 sanattaǵy qylmys boiynsha ótemaqy tóleý qarastyrylǵan;
- tólem mólsheri 30-50 AEK aralyǵynda belgilengen;
- qor qurylǵannan beri 5 myńnan astam adamǵa jalpy 831 mln teńgeden astam ótemaqy tólendi.
Bolashaq tergeýshiler qalai daiyndalyp jatyr?
2019 jyldan beri zań fakýlteti stýdentterine arnalǵan dýaldy oqytý baǵdarlamasy júzege asyrylyp keledi.
Qazirgi tańda:
- joǵary oqý oryndarymen 40 memorandým jasalǵan;
- 47 stýdenttik klýbta 1 524 stýdent bilim alýda;
- 100-den astam túlek ishki ister organdaryna jumysqa ornalasýǵa nietti.
Samat Aisovtyń aitýynsha, bul jumystar quqyq buzýshylyqtardyń aldyn alýdy kúsheitip qana qoimai, azamattardyń qaýipsizdigin qamtamasyz etýge jáne quqyq qorǵaý organdarynyń kadrlyq áleýetin nyǵaitýǵa baǵyttalǵan.
