IIM Tergeý departamentiniń basshysy Sanjar Ádilov 17 jasar Janbolat Aǵadildiń ólimine qatysty tergeý amaldarynyń mán-jaiyn aityp berdi, dep habarlaidy "Ult aqparat".
«10 qarashada elordadaǵy Kóktal shaǵyn aýdanynda tóbeles bolyp, onyń saldarynan pyshaq jaraqatynan 17 jasar Janbolat Aǵadil kóz jumdy. Tergeý amaldary barysynda eregis JShS jumysshylary men Talapker eldi mekeni jastary arasynda bolǵany anyqtaldy», - dedi S. Ádilov ministrlik uiymdastyrǵan onlain brifingide.
Onyń aitýynsha, 6 qarashada Kóktalda jastar arasyndaǵy kikiljiń sońy tóbeleske ulasqan. Bul janjalǵa Talapkerden kelgen ózge adamdarmen birge J. Aǵadil de qatysqany anyqtaldy. Tóbeleste ol pyshaq jaraqatyn alǵan. Atalǵan faktiler boiynsha 293-baby 3-bóligi men 99-baby 2-bóligi boiynsha qylmystyq ister turǵysynda tergeý júrip jatyr.
«Atalǵan aýmaqtaǵy izdestirý sharalary barysynda patrýldik politsiia ókilderi tóbeleste bolǵandardyń barlyǵyn ustady. Politseiler izin sýytpai negizgi kúdiktilerdi de qolǵa túsirdi. Qazirgi kezde tóbeleske qatysqan úsh adam, onyń ishinde adam ólimine qatysty kúdikti bir adam elordada Politsiia departamentiniń ýaqytsha ustaý izoliatoryna qamaldy», - dedi Sanjar Ádilov.
Onyń sózine qaraǵanda, qazirgi kezde is boiynsha jinalǵan aiǵaqtardyń barlyǵyn eskere otyryp, kúdiktilerdiń aiyby dáleldendi. Osy oraida tóbeles boiynsha kúdiktiler, sondai-aq adam ólimine qatysty kúdikti asa aýyr qylmysty jasaýda tolyqtai áshkere boldy.
«Tergeý amaldarynyń barysy qadaǵalaýda tur. Zańnamaǵa sáikes, onyń nátijesin qosymsha jariialaimyz», - dedi S. Ádilov.
Budan buryn habarlanǵandai, Nur-Sultan qalasynyń Kóktal shaǵyn aýdanynyń Bolashaq kóshesinde jastar tóbelesip, saldarynan 17 jastaǵy bozbala kóz jumdy.
