Foto: Polisia.kz
IIM-niń uiymdasqan qylmysqa qarsy kúres departamenti Bas prokýratýranyń úilestirýimen jetekshisi "qańtar oqiǵasyna" belsendi qatysqan Arman Jumageldiev (Dikii Arman) bolyp tabylatyn uiymdasqan qylmystyq topty áshkereleýge jáne joiýǵa baǵyttalǵan is-sharalar keshenin júrgizip jatyr - dep habarlaidy "Ult aqparat" Polisia.kz saityna silteme jasap.
IIM málimetinshe, uiymdasqan qylmystyq toptyń jetekshisi men negizgi qatysýshylary qamaýǵa alynǵanyna qaramastan, onyń basqa músheleri advokattardyń qyzmetterin qarjylandyra otyryp, quqyqqa qarsy qyzmetpen ainalysýyn jalǵastyryp otyr. Atap aitqanda, tergeý protsesiniń qatysýshylaryna buqaralyq aqparat quraldary jáne internet jelisi arqyly qysym kórsetip jatyr.
Ázirlengen josparǵa sáikes atalǵan toptyń qylmystyq áreketi jolyn kesý úsh kezeńde júrgizilgen.
"Birinshi kezeń halyqaralyq izdeýde júrgen, qylmystyq ortada "Nois" degen laqap atymen belgili Jumageldievtiń "oń qoly" basqaratyn uiymdasqan qylmystyq toptyń negizgi kriminaldyq býynyn joiýǵa baǵyttaldy", - delingen habarlamada.
Máselen, 19 sáýirde Almaty qalasynyń, Almaty, Túrkistan, Shyǵys Qazaqstan jáne Pavlodar oblystarynyń aýmaǵynda aýyr qylmystardy jasaýǵa, onyń ishinde 2018 jyly Almatyda oryn alǵan adam óltirýge oqtalýǵa qatysy bar uiymdasqan qylmystyq toptyń 12 múshesi ustalǵan.
Ekinshi kezeńde kriminaldyq ortada "Karas" laqap atymen belgili "Dikii Armannyń" taǵy bir kómekshisi baqylaityn uiymdasqan qylmystyq topty qarjylandyrý arnasy joiylǵan. 25-26 sáýir aralyǵynda Almaty, Shymkent qalalarynda jáne Túrkistan oblysynda 130-dan astam tintý júrgizilip, zańsyz oiyn biznesine jáne atalǵan uiymdasqan qylmystyq topty qarjylandyrýǵa qatysy bar 53 figýrant ustalǵan.
"Osy jedel-tergeý is-sharalarynyń nátijesinde uiymdasqan qylmystyq top qurǵany jáne ony basqarǵany úshin Qylmystyq kodekstiń 262-baby boiynsha eki qylmystyq is tirkeldi. Mamyrda qylmystyq toptyń qyzmetin qarjylandyrý deregi boiynsha Qylmystyq kodekstiń 266-babymen qosymsha sotaldy tergep-tekserý bastaldy", - delingen habarlamada.
12 shildede IIM uiymdasqan qylmysqa qarsy kúres departamenti Bas prokýratýranyń vedomstvoaralyq jedel-tergeý tobymen birlese otyryp, operatsiianyń úshinshi kezeńin iske asyrǵan.
Sonymen qatar Astana, Almaty, Shymkent, Aqtóbe, Qostanai jáne Túrkistan qalalarynda "qańtar oqiǵasy" kezinde Almaty qalasyndaǵy jappai tártipsizdikke belsendi qatysqan 18 figýrantty ustaǵan. 36 tintý is-sharasy júrgizilip, birneshe sholaq qarý, tapanshalar, pyshaqtar, kastet, dini ádebiet, sondai-aq tártipsizdikke qatysqan kúdiktilerdiń kiimderi tárkilengen.
"Osy baǵyttaǵy jedel is-sharalar jalǵasýda. Ózge málimetter tergeý múddesinde jariialaýǵa jatpaidy", – dedi IIM uiymdasqan qylmysqa qarsy kúres departamentiniń basqarma bastyǵy Qýandyq Alpys.
video: Polisia.kz
