QR ishki ister ministriniń orynbasary Rashid Jaqypov politsiia birinshi kezikken adamdardy ustap aldy degen aqparat shyndyqqa janaspaitynyn málimdedi, dep habarlaidy "Ult aqparat" Sputnik Qazaqstan agenttigine silteme jasap.
«Búginde BAQ-tyń jáne qoǵamnyń nazary Almatyda oryn alǵan rezonanstyq qylmysqa aýdarylyp otyr. Bul qylmysty jasaǵandar anyqtalyp, ustaldy. Qylmystyq istiń mán-jaiyn anyqtaýǵa baǵyttalǵan tergeý sharalary júrip jatyr. Sonymen qatar, tiisti saraptamalar da jasalýda», - dep toqtaldy ministrdiń orynbasary.
Jaqypov áleýmettik jeliler men BAQ-ta ustalǵan kúdiktilerge qatysty tarap jatqan aqparat shyndyqqa janaspaitynyn aitty.
"Shyndyǵyn aitsam, biz áleýmettik jeli men BAQ-ta taraǵan aqparattardy oqyp otyramyz. Birden aitqym keledi, politsiia birinshi kezikken adamdy ustap aldy degen málimetter shyndyqqa janaspaidy. Atalǵan qylmysty óz qolymen jasaǵandar ustaldy. Olardyń qylmysqa qatysy baryn dáleldeitin aiǵaqtar bar", — dedi ol.
Eske sala keteiik, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
