Qazaqstan Ishki ister ministrligi (IIM) Qaraǵandydaǵy IIM akademiiasynyń birinshi kýrs jetekshisiniń orynbasary A.Tastaibekovtiń qyzmetinen bosatylǵanyn habarlady. Ministrlik ókili Almas Sadýbaevtyń Facebook-te jazýynsha, Tastaibekov tártiptik komissiia sheshimimen, "memlekettik qyzmet bedelin túsirgeni úshin" ishki ister organdarynda qyzmet isteýden bosatylǵan.
31 jeltoqsanda internette politsiia formasyndaǵy er adamnyń jańa jyldyq quttyqtaýy taraǵan. Videoda er adam basqa politseilerdi merekesimen quttyqtai kele "tamyr-tanystyǵymyzdyń kómegi shóberelerimizge de tisin... Biz - bratvamyz, ashyǵyn aitqanda - bandamyz" deidi. Keiin politsiia formasyndaǵy ondaǵan adam "Ýra!" dep aiǵailaidy.
Bul video sońǵy kúnderi áleýmettik jelide kóp talqylanyp, synǵa ushyrady.
Keiin IIM bul videony Qaraǵandydaǵy IIM akademiiasynyń birinshi kýrs jetekshisiniń orynbasary túsirgenin anyqtaǵan.
Almas Sadýbaevtyń habarlaýynsha, Tastaibekovten ózge onyń bastyqtary men oqý ornynyń basshylary da qatań tártiptik jaýapqa tartylǵan.
