QR Indýstriia jáne infraqurylymdyq damý ministri Beibit Atamqulov arnaiy ekonomikalyq aimaqtardyń (AEA) qyzmetine monitoring júrgizdi. Ásirese, elimizdegi iri AEA-ǵa, onyń ishinde «Aqtaý teńiz porty», «Ońtústik», «Qorǵas» ShYHO«, «Qorǵas - Shyǵys qaqpasy» jáne «UIMT» erekshe mán berildi, dep habarlaidy "Ult aqparat".
QR Prezidenti Qasym-Jomart Toqaevtyń Úkimettiń keńeitilgen otyrysynda bergen tapsyrmalaryn oryndaý aiasynda búgin QR IIDM-de arnaiy ekonomikalyq aimaqtardy damytý máseleleri qaraldy. Jiynǵa ortalyq memlekettik jáne jergilikti atqarýshy organdardyń ókilderi, AEA basqarýshy kompaniialarynyń, institýttar men salalyq uiymdardyń birinshi basshylary qatysty.
Jiyn barysynda jer resýrstaryn tiimdi iske jaratý, infraqurylymdy damytý, kadrlyq jáne investitsiialyq áleýetti paidalaný, sondai-aq shyǵarylatyn ónimderdiń eksportyn damytý máseleleri qaraldy.
2002 jyldan bastap qazaqstandyq AEA-da 15 000-nan astam turaqty jumys oryndaryn qura otyryp, jalpy quny 1 trln teńge bolatyn 292 joba iske qosyldy. Ónim óndirý kólemi 3,8 trln teńgeni qurady, onyń 282,8 mlrd teńgesi – eksport (7,5%). Salyq tólemderiniń somasy 216,3 mlrd teńgeni qurady.
Mysaly, «Ońtústik» AEA aýmaǵynda shaǵyn jáne orta biznes kásiporyndary shoǵyrlanǵan toqyma klasteri quryldy. Al, «Astana-jańa qala» AEA-da temir jol mashina jasaý klasteri negizin qalady. Munai-himiia klasteriniń negizi «UIMT» AEA-da damýda, sondai-aq «Aqtaý teńiz porty»AEA aýmaǵynda týrizm salasy órkendeýde.
Búginde 178 joba iske asyrylý ústinde. Olardyń jalpy quny 8,3 trln teńgeni qurasa, 15 myń jumys ornyn qurý qarastyrylǵan.
Óz kezeginde kezdesýge qatysýshylar AEA jumysynyń tiimdiligin atap ótti. Aimaqtardyń infraqurylymyna salynǵan 1 biýdjettik teńgege 3,9 teńge investitsiia tartylady.
Anyqtama úshin:
Qazirgi ýaqytta Qazaqstanda 13 AEA qurylyp, jumys isteýde. Olardyń qyzmetin baqylaýdy 12 basqarýshy kompaniia júzege asyrady. Barlyq AEA-nyń jalpy aýdany 20 000 gektardan asady.
