Premer-Ministr Asqar Maminniń tóraǵalyǵymen ótken Úkimet otyrysynda energetika ministri Nurlan Noǵaev aldaǵy kúzgi-qysqy kezeńge daiyndyq týraly baiandady, dep habarlaidy "Ult aqparat" primeminister.kz saityna silteme jasap.
N. Noǵaevtyń aitýynsha, jalpy alǵanda, Qazaqstan Respýblikasynda jylý berý kezeńi turaqty rejimde ótti.
«Qysqy júkteme maksimýmy 2020 jylǵy 9 qańtarda belgilengen jáne 15 182 MVt-ty qurady, bul ótken jyldyń deńgeiinen 4%-ǵa artyq», — dedi energetika ministri.
226 energiia kásiporny (nemese 87%) 2019-2020 jyldardaǵy kúzgi-qysqy kezeńde jumysqa ázirlik pasportyn aldy. Ázirlik pasportyn almaǵan 34 energiia kásiporny ákimshilik jaýapkershilikke tartyldy.
«Mundai kásiporyndar úshin jylý berý maýsymyna daiyn bolmaý saldarynan elektr qýatyn óshirý qaýpi joǵary. Alaida, olar tyiymdardyń bolmaýyna bailanysty óz qyzmetin ári qarai jalǵastyrýda. Aiyppuldardyń mólsheri az bolǵandyqtan, energetikalyq mekemeleri jylý berý maýsymyna daiyn bolý úshin pasport alýdan bas tartyp otyr. Bul másele turaqty túrde Ministrlikte kóterilýde, biraq qoldaý tappady», — dedi N. Noǵaev.
2019 jyly Qazaqstannyń Biryńǵai elektr energetikalyq júiesinde 3 996 tehnologiialyq buzýshylyq oryn aldy. Ótken jyldyń uqsas kezeńimen salystyrǵanda tehnologiialyq buzýshylyqtar sany 34-ke nemese 1,3%-ǵa azaidy, jylytý kezeńinde 135 nemese 6%-ǵa ósti.
Ótken jylytý kezeńinde jylýmen jabdyqtaý kásiporyndarynyń jergilikti atqarýshy organdarmen bekitilgen jylý jelileri jumysynyń temperatýralyq kestesin saqtamaýynyń 48 jaǵdaiy tirkeldi, bul ótken jyldyń deńgeiinen 20%-ǵa az.
Ótken jylytý maýsymynda energiia kózderinde paidalanylatyn otyn qorynyń qajetti kólemi 3 mln kómir jáne 120 myń tonna mazýt qamtamasyz etildi.
N. Noǵaev jylytý maýsymyna daiyndyq kezinde sheshimdi qajet etetin mańyzdy másele — otynǵa kreditorlyq bereshektiń aitarlyqtai úlken kólemi.
«Biylǵy 1 maýsymdaǵy jaǵdai boiynsha energiia óndirýshi uiymdardyń “QazTransGaz-Aimaq” AQ aldyndaǵy bereshegi 6,4 mlrd teńgeni quraidy. Sondai-aq energiia óndirýshi uiymdardyń “Bogatyr-Kómir” JShS aldyndaǵy jalpy somasy 3,3 mlrd teńgeni quraityn qaryzy bar», — dedi ministr.
Búginde energetikalyq kásiporyndar aldaǵy kúzgi-qysqy kezeńge daiyndyqty bastady.
Biyl 8 energoblokty, 59 qazandyqty, 44 týrbinany jóndeý josparlanǵan. Maýsym aiynyń basynda 3 energoblokta, 5 qazandyqta jáne 8 týrbinada jumystar aiaqtaldy. Jóndeýdiń ártúrli satylarynda 3 energoblokta, 21 qazandyqta jáne 9 týrbinada jumystar júrgizilýde. Jalpy jóndeý jumystary kestege sáikes júrgizilýde.
Qazaqstan Respýblikasynyń birtutas elektr energetikalyq júiesiniń elektr jelilerin 2020-2021 jyldardaǵy kúzgi-qysqy kezeńge daiyndaý úshin jalpy uzyndyǵy 25 828 km elektr berý jelilerin, sondai-aq 429 birlik joǵary voltty qosalqy stantsiialardy jóndeý josparlanǵan. Búgingi kúni elektr jelilerinde 1140 km elektr berý jelileri men 65 shaǵyn stantsiiaǵa jóndeý jumystary júrgizildi.
N. Noǵaev iesiz dep tanylǵan elektr jelilerin joiý boiynsha júrgizilip jatqan jumystarǵa toqtaldy.
Ministrdiń aitýynsha, «100 naqty qadam» Ult josparynyń 51-qadamynda belgilengen mindetterdi júzege asyrý aiasynda iesiz jelilerdi joiý qarastyrylǵan.
Aýqymdy jumys atqaryldy. Iesiz jelilerdiń uzyndyǵy edáýir tómendedi. Júrgizilgen jumystyń qorytyndysy boiynsha 2020 jylǵy qańtardaǵy jaǵdai boiynsha iesiz elektr jelileriniń uzyndyǵy 225 km jáne 98 transformatorlyq qosalqy stantsiiany qurady», — dep habarlady N. Noǵaev.
Jalpy alǵanda, anyqtalǵan iesiz elektr jelileri 2020 jyldyń sońyna deiin energiia berýshi uiymdardyń balansyna berilýi tiis.
Sońynda N. Noǵaev 2020-2021 jj. kúzgi-qysqy kezeńderden tabysty ótý úshin birqatar oryndalýy tiis mindetterdi atap ótti:
- elektr stantsiialarynda, elektr jelilerinde barlyq jóndeý jumystaryn oryndaý;
- energiia kózderi qoimalarynda otynnyń normativtik jinaqtalýyn qamtamasyz etý;
- otyn jetkizýshilerdiń aldyndaǵy bereshektiń tómendeýin qamtamasyz etý;
- kommýnaldyq qyzmetterdi tutynýshylardyń jetkizýshiler aldyndaǵy debitorlyq bereshegin jáne energiiamen jabdyqtaýshy uiymdardyń kreditorlyq bereshegin tómendetý jóninde sharalaryn qabyldaý;
- bilim berý, densaýlyq saqtaý, tirshilikti qamtamasyz etý obektilerin, eldi mekenderdiń áleýmettik jáne mádeni obektilerin daiyndaý jónindegi barlyq is-sharalardy oryndaý;
- kommýnaldyq-turmystyq tutynýshylardyń qaryzdaryn azaitý jóninde sharalaryn qabyldaý;
- Ádilet, energetika, ulttyq ekonomika ministrlikterine jáne «Atameken» Ulttyq kásipkerler palatasy múddeli taraptarmen birlese otyryp, energetikalyq kásiporyndar jylytý kezeńine ázirlik pasportyn almaǵan jaǵdaiynda, aiyppuldyń kólemin arttyrý máselesin pysyqtaý qajet.
«Ministrlik jergilikti atqarýshy organdarmen birlese otyryp, aldaǵy jylytý maýsymyna energiia kásiporyndarynyń daiyndyǵyn baqylaý boiynsha jumystaryn ári qarai jalǵastyrýda», — dep túiindedi N. Noǵaev.
