Ǵylym jáne joǵary bilim ministrligi janynan Qoǵamdyq keńes quryldy. Onyń quramyna Parlament depýtattary, memleket jáne qoǵam qairatkerleri, ǵalymdar, oqytýshylar, azamattyq qoǵam jáne BAQ ókilderi kirdi, dep habarlaidy QazAqparat.
Ǵylym, joǵary bilim jáne til saiasaty máseleleri jónindegi qoǵamdyq keńestiń alǵashqy otyrysyna ministr Saiasat Nurbek qatysyp, vedomstvonyń aldaǵy josparlaryna toqtaldy.
«Jańadan qurylǵan ministrliktiń aldyna Memleket basshysy úlken mindetter qoiyp otyr. Ǵylym men joǵary bilim salasyna qatysty barlyq sheshimderdi ózderińizdiń talqylaýlaryńyzǵa usynamyz. Sebebi Qoǵamdyq keńestiń jumysy arnaiy zańmen aiqyndalǵan. Quzyreti de joǵary. Jurtshylyqtyń, azamattyq qoǵamnyń pikirin eskerip, bizge qoldaý kórsetedi dep senemiz», – dedi ministr.
Otyrysqa Qoǵamdyq keńestiń 17 múshesiniń 11-i oflain, 6-ýy onlain qatysty. Daýys berý arqyly ǵylym jáne joǵary bilim salasynda, sondai-aq qoǵamdyq keńes jumysyn júrgizýde tájirbiesi mol qoǵam qairatkeri Serik Yrsaliev Qoǵamdyq keńes tóraǵasy bolyp sailandy.
Ministrliktiń salalyq baǵyty eskerilip, 5 komissiia quryldy. Olardyń tóraǵalary sailandy.
1. Normativtik-quqyqtyq aktilerdiń jobalaryn qaraý jáne sybailas jemqorlyqqa qarsy is-qimyl máseleleri boiynsha komissiia tóraǵasy bolyp «D. Serikbaev atyndaǵy Shyǵys Qazaqstan tehnikalyq ýniversiteti» kommertsiialyq emes aktsionerlik qoǵamynyń ǵylymi keńesshisi Jasulan Shaimardanov;
2. Biýdjet máseleleri boiynsha komissiia tóraǵasy bolyp QR Parlamenti Májilisiniń depýtaty Irina Smirnova;
3. Ǵylym máseleleri boiynsha komissiia tóraǵasy bolyp «QazBioPharm» Ulttyq holdingi» aktsionerlik qoǵamynyń basqarma tóraǵasy Kúnsulý Zakariia;
4. Joǵary bilim máseleleri boiynsha komissiia tóraǵasy bolyp azamattyq qoǵam ókili Amantai Nurmaǵambetov;
5. Til saiasaty máseleleri boiynsha komissiia tóraǵasy bolyp QR Parlamenti Májilisiniń depýtaty Maqpal Tájmaǵambetova sailandy.
Jiyn sońynda 3 jylǵa sailanǵan Qoǵamdyq keńestiń tóralqasy bekitildi.
