عىلىم جەنە جوعارى بٸلٸم مينيسترلٸگٸ جانىنان قوعامدىق كەڭەس قۇرىلدى. ونىڭ قۇرامىنا پارلامەنت دەپۋتاتتارى, مەملەكەت جەنە قوعام قايراتكەرلەرٸ, عالىمدار, وقىتۋشىلار, ازاماتتىق قوعام جەنە باق ٶكٸلدەرٸ كٸردٸ, دەپ حابارلايدى قازاقپارات.
عىلىم, جوعارى بٸلٸم جەنە تٸل ساياساتى مەسەلەلەرٸ جٶنٸندەگٸ قوعامدىق كەڭەستٸڭ العاشقى وتىرىسىنا مينيستر ساياسات نۇربەك قاتىسىپ, ۆەدومستۆونىڭ الداعى جوسپارلارىنا توقتالدى.
«جاڭادان قۇرىلعان مينيسترلٸكتٸڭ الدىنا مەملەكەت باسشىسى ٷلكەن مٸندەتتەر قويىپ وتىر. عىلىم مەن جوعارى بٸلٸم سالاسىنا قاتىستى بارلىق شەشٸمدەردٸ ٶزدەرٸڭٸزدٸڭ تالقىلاۋلارىڭىزعا ۇسىنامىز. سەبەبٸ قوعامدىق كەڭەستٸڭ جۇمىسى ارنايى زاڭمەن ايقىندالعان. قۇزىرەتٸ دە جوعارى. جۇرتشىلىقتىڭ, ازاماتتىق قوعامنىڭ پٸكٸرٸن ەسكەرٸپ, بٸزگە قولداۋ كٶرسەتەدٸ دەپ سەنەمٸز», – دەدٸ مينيستر.
وتىرىسقا قوعامدىق كەڭەستٸڭ 17 مٷشەسٸنٸڭ 11-ٸ وفلاين, 6-ۋى ونلاين قاتىستى. داۋىس بەرۋ ارقىلى عىلىم جەنە جوعارى بٸلٸم سالاسىندا, سونداي-اق قوعامدىق كەڭەس جۇمىسىن جٷرگٸزۋدە تەجٸربيەسٸ مول قوعام قايراتكەرٸ سەرٸك ىرساليەۆ قوعامدىق كەڭەس تٶراعاسى بولىپ سايلاندى.
مينيسترلٸكتٸڭ سالالىق باعىتى ەسكەرٸلٸپ, 5 كوميسسييا قۇرىلدى. ولاردىڭ تٶراعالارى سايلاندى.
1. نورماتيۆتٸك-قۇقىقتىق اكتٸلەردٸڭ جوبالارىن قاراۋ جەنە سىبايلاس جەمقورلىققا قارسى ٸس-قيمىل مەسەلەلەرٸ بويىنشا كوميسسييا تٶراعاسى بولىپ «د. سەرٸكباەۆ اتىنداعى شىعىس قازاقستان تەحنيكالىق ۋنيۆەرسيتەتٸ» كوممەرتسييالىق ەمەس اكتسيونەرلٸك قوعامىنىڭ عىلىمي كەڭەسشٸسٸ جاسۇلان شايماردانوۆ;
2. بيۋدجەت مەسەلەلەرٸ بويىنشا كوميسسييا تٶراعاسى بولىپ قر پارلامەنتٸ مەجٸلٸسٸنٸڭ دەپۋتاتى يرينا سميرنوۆا;
3. عىلىم مەسەلەلەرٸ بويىنشا كوميسسييا تٶراعاسى بولىپ «QazBioPharm» ۇلتتىق حولدينگٸ» اكتسيونەرلٸك قوعامىنىڭ باسقارما تٶراعاسى كٷنسۇلۋ زاكارييا;
4. جوعارى بٸلٸم مەسەلەلەرٸ بويىنشا كوميسسييا تٶراعاسى بولىپ ازاماتتىق قوعام ٶكٸلٸ امانتاي نۇرماعامبەتوۆ;
5. تٸل ساياساتى مەسەلەلەرٸ بويىنشا كوميسسييا تٶراعاسى بولىپ قر پارلامەنتٸ مەجٸلٸسٸنٸڭ دەپۋتاتى ماقپال تەجماعامبەتوۆا سايلاندى.
جيىن سوڭىندا 3 جىلعا سايلانعان قوعامدىق كەڭەستٸڭ تٶرالقاسى بەكٸتٸلدٸ.
