QR Bilim jáne ǵylym ministri Ashat Aimaǵambetov ǵylym salasyndaǵy biýrokratiia kóptegen kedergige jaǵdai jasaitynyn málim etti, dep habarlaidy QazAqparat.
«Biz ǵylym salasyndaǵy biýrokratiialyq sipattaǵy ártúrli protsedýrany retteýimiz kerek. Máselen bir jas ǵalym grant utyp alyp, bil ózekti problemany zerttegisi keldi delik. Áý basta ol máselen Pavlodar nemese Shymkent qalasyn zertteý nysany retinde tańdaýy múmkin. Alaida ol taqyrypty ózgertpei, halyq sany men qurylymy Pavlodar nemese Shymkentke uqsas basqa qalany tańdaý týraly qaita ótinish joldaýy yqtimal. Alaida ol úshin ǵalym qaitadan kúrdeli protsedýralardan, maquldaýlardan ótýi tiis. Biz osy protsedýralarmen ártúrli insinýatsiialarǵa jol beremiz», - dedi Ashat Aimaǵambetov ýniversitet basshylarymen ótkizgen onlain rejimdegi jiynda.
Ministrdiń aitýynsha búginniń ózinde Bilim jáne ǵylym ministrligi kezekten tys 2 konkýrs jariialaǵan.
«Ǵylymi granttar boiynsha jalpy somasy 20 mlrd teńgeden astam qarajat bólindi. Bul Memleket basshysynyń ǵylymdy qoldaý tapsyrmasy sheńberinde iske asyrylyp otyr. Sondyqtan biyldyń ózinde birneshe ǵylymi konkýrs bolady. Qazir ǵylym salasyn qarjylandyrýǵa úlken kóńil bólinýde», - dedi ol.
