Foto: ortcom.kz
Ulttyq quryltai múshesi, Ulttyq ǵylym akademiiasynyń akademigi, Akademik E.Býketov atyndaǵy Qaraǵandy zertteý ýniversitetiniń rektory, professor Nurlan Dýlatbekov Býrabaida ótip jatqan Ulttyq quryltaida kóterilgen máselelerge qatysty pikir bildirdi, dep habarlaidy Ult.kz."Qoǵamnyń san salasyn qamtityn, ásirese áleýmettik sektor men ideologiia jaǵyna kóbirek mán beretin Ulttyq quryltai otyrystarynda men negizinen ózime jaqyn bilim men ǵylym salasynyń ózekti máselelerin kóterip kelemin. Kóńilge qonymdysy tórt ret ótken otyrystyń eshqaisysynda bilim men ǵylym máseleleri shet qalǵan emes", -degen N. Dýlatbekov atalǵan salaǵa qatysty aitylǵan dúnieler óz nátijesin bere bastady dep esepteidi.
"Iaǵni bizdiń kóptegen usynysymyz eskerilip, júzege asyrylyp keledi. Atap aitsaq, ǵylymdy damytý, onyń qarjylyq áleýetin arttyryp, biýdjetin kóterý syndy máseleler kún tártibine alyndy. Quryltaidyń bir jaqsy jeri munda aitylǵan oi-pikiriń biýrokratiialyq kedergilerge tap bolmaidy. Iaǵni osy jerde aitylǵan usynystar hattamaǵa engizilip, birden ministrlikterge jol tartady", -dedi ol.
Sondai-aq elimiz boiynsha Ulttyq quryltaiǵa úsh ýniversitettiń rektory múshe. "Biz sol úsh ýniversitettiń basshylary ózara aqyldasa otyryp, ekperttik top quryp, joǵary oqý oryndarynyń basty máselelerin anyqtap, ustaz ǵalymdardyń pikiri negizinde usynystar daiyndaimyz" deidi.
"Mine, osyndai bastamamyz óz nátijesin berip jatqany qýantady. Iaǵni Arqalyqtaǵy pedagogikalyq institýt budan bylai ýniversitet statýsyn alatyny úlken jetistik bolyp otyr.
Budan bólek, Prezident aityp ótken óńirlik joǵary oqý oryndarynyń ǵylymi áleýetin kóterý maqsatynda tehnoparkter qurý isi de óz júiesin tapty. Rasynda sońǵy tórt jylda ǵylym men bilimge kóp kólemde qarjy bóline bastady. Tipti byltyrǵy qiynshylyqtarǵa qaramastan JOO-larǵa ǵylym baǵytynda kórsetilgen qoldaý toqtaǵan joq.
Dese de saladaǵy kemshilikterdi aita ketken jón. Ásirese otyz jyldyń ishinde ýniversitetterdiń infraqurylymyn aqsatyp aldyq. Damý bylai tursyn, quldyrai tústi. Jataqhana da, zerthana salý da jaiyna qaldy. Endi-endi ǵana bul sala eńse tiktep, qarjylyq qoldaý kórip keledi. Olai bolsa budan bylai memleket te bólinip jatqan qarjynyń qaitarymyn kútedi. Iaǵni ǵylym men bilim de memleket damýyna qyzmet etý qajet. Ǵylymdy kommertsiialandyrýdy údetip, biznespen, kásiporyndarmen bailanys ornatyp, olarmen etene jaqyn jumys isteý syndy maqsattardy qolǵa alý qajet-aq", -deidi ol.
Sondai-aq «Serpin» baǵdarlamasyna da serpin bergen jón dep esepteiti professor. Iaǵni onyń pikirinshe jobany toqtatpai, damyta túsken abzal. Kezinde bul jobamen tek bakalavr ǵana daiyndap kelsek, endigi jerde magistranttardy, PhD doktorlardy daiyndaýdy da qolǵa alýymyz qajet. Sonda ortalyqtan shalǵai jatqan oblystarǵa úlken qoldaý jasar edik dep esepteidi Ulttyq quryltai múshesi.
