Foto: kostanaytany.kz
Búgin – ǵylym kúni. Aitýly dataǵa orai Ǵylym jáne joǵary bilim ministri Saiasat Nurbek ǵylym salasynda qolǵa alynǵan bastamalardy atap, sala mamandaryn kásibi merekesimen quttyqtady.
– Búgin – Qazaqstannyń ǵylym qyzmetkerleri kúni! Bul kúnniń 12 sáýirge belgilenýi tegin emes. Dál osy kúni elimizdiń ǵylymyn álemdik deńgeige kótergen, kórnekti ǵalym, akademik Qanysh Imantaiuly Sátbaev dúniege kelgen edi. Ol ulttyq ǵylymdy júieli jolǵa qoiyp, irgeli zertteýlerdiń negizin qalady. Ǵylym – el damýynyń altyn dińgegi. Sondyqtan bul salany damytý – memlekettiń basym baǵyttarynyń biri. Prezident Qasym-Jomart Toqaev 2022 jyly Ǵylym akademiiasynyń sessiiasynda ǵylymnyń ekonomikalyq ósimge áserin kúsheitý, ony óndiris pen tehnologiiamen ushtastyrý jóninde naqty tapsyrmalar berdi, - degen jazba qaldyrdy Saiasat Nurbek jelidegi paraqshasynda.
Ministrdiń aitýynsha, búginde «Ǵylym jáne tehnologiialyq saiasat týraly» jańa Zańnyń negizin qalap, 2023 - 2029 jyldarǵa arnalǵan Joǵary bilim men ǵylymdy damytý tujyrymdamasy aiasynda júzege asyrylyp, ǵylym salasynda aýqymdy ózgerister bolyp jatyr.
Biyldan bastap óńirlik ǵylymdy damytýǵa erekshe mán beriledi. Jergilikti atqarýshy organdar ǵylymi-tehnologiialyq saiasatqa tikelei qatysa bastaidy.
– Memleket jas ǵalymdarǵa jan-jaqty qoldaý kórsetip otyr. Olar úshin granttyq qarjylandyrý, sheteldik taǵylymdamalar, mega-granttar, ǵylymi dáreje úshin qosymsha tólemder, tipti turǵyn úimen qamtamasyz etý siiaqty áleýmettik qoldaý tetikteri iske qosyldy. Sońǵy 2 jylda jas ǵalymdarǵa 423 páter berildi. Jyl saiyn 50 «Úzdik ǵylymi qyzmetker» syilyǵy tabystalady. Daryndy jas zertteýshilerge taǵy 50 arnaiy stipendiia bólinedi. Búgingi ǵylym – tek zertteý emes, ol – ekonomikanyń qozǵaýshy kúshi. Sondyqtan biz ǵylymi ázirlemelerdi kommertsiialandyrýǵa erekshe mán berip otyrmyz. Qazirgi ýaqytta 208 ǵylymi joba iske asyrylyp jatyr. Onyń 25-i eksportqa shyqty. Al 6 joba – 1 milliard teńgeden astam satylymǵa qol jetkizdi. Jalpy alǵanda, kommertsiialanǵan jobalardyń el ekonomikasyna qosqan úlesi – 118,4 milliard teńge. Biyldan bastap óńirlerdegi ǵylymi basqarý júiesi kúsheitildi, - deidi vedomstvo basshysy.
Sondai-aq S.Nurbek qazir óńir ákimdikteri janynan ǵylym jónindegi keńester qurylyp, Qaraǵandy, Soltústik Qazaqstan jáne Túrkistan oblystary óńirlik granttyq baǵdarlamalar men ǵylymi sessiialarǵa belsendi qatysa bastady. 2024 - 2026 jyldary óńirlerde zertteýshilik artyqshylyq ortalyqtaryn qurý úshin 17 baǵdarlama engiziledi.
- Qadirli áriptester! Qazaqstan ǵylymynyń altyn qazyǵyn ustap turǵan ǵalymdarǵa, zertteýshilerge, oqytýshylarǵa shynaiy alǵysymdy bildiremin. Sizderdiń eren eńbekterińiz – eldiń erteńine salynǵan berik negiz, - dep quttyqtady Ǵylym ministri.
Aita keteiik, 10 sáýirde Prezident Qasym-Jomart Toqaev el ǵalymdarymen basqosýda Táýelsizdiktiń alǵashqy jyldarynda ǵylymǵa basa mán berilmegenin eske saldy. Sondai-aq Memleket basshysy ǵylym salasynda jemqorlyq faktileriniń kóbeiip ketkenin aitty.
