«Ǵylym qory» tolyqqandy jumys isteý úshin 200 mlrd teńge bólý qajet. Bul týraly búgin QR Parlamenti Senatynyń depýtaty Baqytjan Jumaǵaulov aitty, dep habarlaidy QazAqparat.
«Búkil álemde tehnologiialardy kommertsiialandyrýǵa memleket barynsha az qarjy salady. Degenmen, Qazaqstan biznesiniń áli aiaǵynan nyq turmaǵandyǵyn eskersek, eldegi qarjylandyrý mardymsyz ekendigi túsinikti. Sondyqtan memlekettiń kommertsiialandyrýdy qoldaý sharalary taiaý 5-10 jyl ishinde baiypty ári eleýli bolýy tiis. Oljas Qudaibergenovtyń Ǵylym qoryna jer qoinaýyn paidalanýshylardyń 1 paiyzyn tartý jospary bar. Bul óte jaqsy. Ǵylym qoryn qarjylandyrýdy tolyqtai qarastyrý qajet. Aryn Orsarievke (Ǵylym qorynyń tóraǵasy) keminde 200 mlrd teńge bólý qajetti týraly keńes bergim keledi. Sonda ǵana qor tolyqqandy jumys isteidi. Bul aktsionerlik qoǵam jáne jarǵylyq qoryn barlyq ýaqytta tolyqtyrýǵa bolady», - dedi senator elordada ótip jatqan tehnologiialardy komertsiialandyrý jónindegi forýmda.
Sonymen qatar ol otandyq ǵylymnyń damýyna bólinetin qarjynyń mardymsyz bolýy kedergi keltirip otyrǵandyǵyn aitty.
«Biyl QR Úkimeti janyndaǵy Joǵary ǵylymi-tehnikalyq komissiianyń otyrysynda maqsatty qarjylandyrý baǵdarlamasyn 65 paiyzǵa ulǵaitty. Bul jaqsy kórsetkish. Granttyq qarjylandyrý 115 paiyzǵa, iaǵni 2 eseden astamǵa arttyryldy. Al tehnologiialardy kommertsiialandyrý 5,4 mlrd teńge deiinde qalýy ókinishti-aq. Bul jerde túsinbestik bolǵan siiaqty. Munda qordyń da kinási bar. 38 mlrd teńgeden astam qarajatqa 153 joba júzege asyrylyp jatyr. Ǵylym qory jumys istegen 5 jyldyń ishinde biznestiń teń qarjylandyrýy 14,5 paiyz, shamamen 5 mlrd teńge boldy», - dedi B.Jumaǵulov.
