Qairat Nurtastyń anasy ulyn "jerge" teńegen Bibigúl Tólegenovanyń synyna jaýap berdi. Stan.kz tilshisine bergen suhbatynda Gúlzira Úsenqyzy Qairatty jerden alyp, jerge salǵan saiyn júregi tilinetinin aitty. Soǵan qaramastan, Bibigúl Tólegenovaǵa renjimeitinin jetkizdi.
"Qairat 16 jasynda Júsipbek Elebekov atyndaǵy estrada jáne tsirk kolledjine oqýǵa tústi. Qazaqstannyń xalyq ártisi Laki Kesoglýdyń shákirti bolyp, 4 jyl sol kisiniń synybynda bilim aldy, 17 jasynda "Arman" áni xit bolyp, búkil Qazaqstanǵa tanyldy.
Qairat bala kezinen saxnaǵa shyǵyp, saxnanyń kieliligin túsingen adam. Árine respýblikalyq konkýrstarǵa qatysyp, júldeli oryndarǵa ie bolǵan. "Boztorǵai" baiqaýynda - 1-oryn, "Ánshi balapanda" - 3-oryn, "Ánshi bolǵym keledi" - 2-oryn, halyqaralyk "Shabyt" festivaliniń laýreaty, "Almaty áýeni" ánshiler baiqaýynda – 1-oryn, respýblikalyq Abai oqýlarynda - 1-oryn, "Jas daryn" ánshiler baiqaýynda - 1-oryn, "Saz álemi" tele-jobalyq baiqaýynda bas júldeni ielendi. Reseilik "MýzTv" arnasynyń "Eń úzdik qazaqstandyq ánshi" atalymyn jeńip aldy", - dep atap ótti Qairattyń anasy.
Gúlzira Aidarbekova Qairat pen Dimashtyń aǵa-ini retinde jaqsy aralasatynyn tilge tiek etti.
"Qairat Dimashty inisi retinde jaqsy kóredi, syilaidy. Árine, aralasady", - dedi ol.
Budan keiin Gúlzira Úsenqyzy Bibigúl Tólegenovanyń synyna jaýap berdi. "Al Bibigúl apamyzdyń syny qanshalyqty oryndy, orynsyz ekenin xalyq aitady. Ár adamnyń óz oiy, pikiri bar. Qairat úshin óziniń súiikti apaiy, qazaqtyń bulbuly Bibigúl Tólegenovanyn eki qazaqtyń balalaryn bireýin "kókke", ekinshisin "jerge" teńegeni árine, ońai tidi dep oilamaimyn. Biraq Qudaidyń jaratqan jerinen nár alyp, jer basyp ómir súrip júrmiz, demimiz taýsylǵanda da jerge tapsyrylamyz, sondyqtan "jerge" teńegenine asa bir qatty renjip otyrǵan joqpyn. Jalpy salystyrǵanda turǵan eshteńe joq. Báseke barlyq jerde bolady. Ainalyp kelgende saralap alatyn xalyq! Kóteretin de xalyq, óshiretin de xalyq! Baýyr etiń balańdy jerden alyp, jerge salyp jatsa kez-kelgen ananyń júregin pyshaqpen tilgenmen birdei. Men árdaiym sabyrǵa kelip, balalarymnyń amandyǵyn, abyroily bolǵanyn Alladan surap otyramyn", - dep túiindedi sózin Qairattyń anasy ári prodiýseri.
Al belgili prodiýser Baian Esentaeva Qairat Nurtas pen Dimash Qudaibergendi salystyrýǵa bolmaitynyn aitty.
"Net proroka v svoiom otechestve - bul biz týraly aityl sóz siiaqty. Barlyǵymyz ártúrlimiz. Qairat ta, Dimash ta. Olardy salystyrýǵa bolmaidy, kemi kásibi emes. Árqaisysy daryndy ári súiikti, árqaisysy óz janrynda. Adamǵa kúie jaǵýǵa, tas atýǵa, atyna kir keltirýge bolar, biraq darynyn eshkim alyp qoia almaidy. Dimashqa da, Qairatqa da sáttilik tileimin jáne adamdar bir-birine alda qaiyrymdy ári tózimdi bolady dep senemin", - dep jazdy Baian Maqsatqyzy Instagram jelisinde.
Taǵy bir qazaqstandyq prodiýser Baǵym Muhitdenova da eki ánshini salystyrýǵa kelmeitinin aityp ótti.
"Bizde myńdaǵan Qairat Nurtas joq, myńdaǵan Dimash Qudaibergenov te joq. Biz onsyz da azbyz. Andrea Bochelli men Maikl Djeksondy salystyrý múmkin emes. Ol ekeýi eki janrdyń adamy. Qairat pen Dimash kóp eńbektendi, talai shalynysty, búginde ekeýi de úlken jetistikterge jetti. Onyń bárin el salystyrsyn nemese janjal shyǵarsyn dep emes, tyńdarmandaryn qýantý úshin istedi. Jaqynda ǵana Qairattyń prodiýseri suhbat berip, Qairattyń Dimash, al Dimashtyń Qairat bola almaitynyn túsinikti túrde jetkizdi. Munyń nesi túsiniksiz? Ol ekeýi múldem eki túrli", - deidi Baǵym Muhitdenova.
Al kúni keshe KSRO halyq ártisi Bibigúl Tólegenova qazaqstandyq ánshiler Qairat Nurtas pen Dimash Qudaibergenniń aiyrmashylyǵy qandai ekenin aitqan bolatyn.
"Bizde Qairat siiaqtylar myńdaǵan. Men qazir 88-demin. Osy jasyma deiin osyndai qanshama "qubylysty" kórdim. Al solar qaida? Qairat toilarda án aitatyn adam, ol jergilikti oryndaýshy. Qairatty bizden basqa kim tanidy, surap kórińizdershi (...) Al biz ony Dimashpen salystyramyz. Ekeýiniń arasy jer men kóktei (...) Men Qairat Nurtasty ánshi dep eseptemeimin, tilimdi kesip alsańyzdar da solai. 5 jyldan keiin Qairat bolmaidy, oǵan qazirdiń ózinde eliktep shyǵyp ta jatyr. Sebebi mundai óner báriniń qolynan keledi. Al Dimashqa elikteý óte qiyn. Dimashtai bolý úshin nápaqa tabýǵa toiǵa barmai, bala kúnińnen bastap oqýyń kerek", - degen edi Tólegenova.
