Qazaqstan Respýblikasynyń Memlekettik hatshysy Gúlshara Ábdiqalyqova jumys saparymen Birikken Arab Ámirlikterine bardy, dep habarlaidy Aqordanyń resmi saity.
Sapar aiasynda Memlekettik hatshy Birikken Arab Ámirlikteri Isker áielder keńesiniń prezidenti Farida ál-Aýadidiń shaqyrýymen Qazaqstan jáne Birikken Arab Ámirlikteri Isker áielderi biznes-forýmyna qatysty. Jiynǵa memlekettik organdardyń, «Atameken» ulttyq kásipkerler palatasynyń, Birikken Arab Ámirlikteri Isker áielder keńesiniń jáne basqa da kásipker áielder qoǵamdastyǵynyń ókilderi qatysty.
Gúlshara Ábdiqalyqova óz sózinde Prezident Nursultan Nazarbaev pen sheih Zaid ben Sultan Nahaian ornatqan dostyq bailanystar Qazaqstan Respýblikasy men Birikken Arab Ámirlikteriniń arasyn jaqyndatyp otyrǵanyn atap ótti.
- Biz ekonomikada teń quqyqtar men múmkindikterdi qamtamasyz etý isinde aitarlyqtai ilgeriledik. 2018 jyly Qazaqstan Dúniejúzilik ekonomikalyq forýmnyń baǵalaýy boiynsha «áielderdiń ekonomikaǵa atsalysýy jáne múmkindikteri» kórsetkishi jóninen 32-shi oryndy ielendi. Bizge tsifrlandyrý isine basa nazar aýdara otyryp, biznes-qoǵamdastyqtardyń ekonomika, saýda, tehnologiia jáne ózge de salalardaǵy yntymaqtastyǵyn tereńdetý qajet, - dedi Memlekettik hatshy.
G.Ábdiqalyqova ekonomikalyq ilgerileýdiń Jastar jylynyń basymdyqtarynyń biri retinde belgilengenin aitty. Búginde qyzdar biznespen belsene ainalysyp, kreativti startaptar ázirleýde. Jastar jyly aiasynda 11 baǵyt boiynsha 100-den astam joba júzege asyrylatyn bolady.
Forým aiasynda Memlekettik hatshy Gúlshara Ábdiqalyqova BAÁ Isker áielder keńesiniń prezidenti Farida ál-Aýadimen kezdesti. Áńgimelesý barysynda áielderdiń múmkindikterin odan ári keńeitý, sonymen qatar áielder kásipkerligi institýtyn nyǵaitý máseleleri talqylandy.
Sonymen qatar, Memlekettik hatshy BAÁ Federaldy ulttyq keńesiniń tóraiymy Amal ál-Kýbeisimen kezdesti. Kezdesý barysynda áleýmettik-ekonomikalyq jáne mádeni-gýmanitarlyq yqpaldastyq máseleleri qaraldy. Qazaqstannyń da Ámirlikter siiaqty Taiaý Shyǵysta bárine ortaq ádiletti ári berik beibitshiliktiń tezirek ornaýyna múddeli ekeni aityldy. Taraptar ekijaqty yntymaqtastyq aiasynda Astana men Abý-Dabi ózara tyǵyz qarym-qatynastardy jalǵastyra beretinin rizashylyqpen atap ótti.
