Qyzylorda oblysynyń ákimi Gúlshara Ábdiqalyqova oblys jurtshylyǵyna úndeý jariialady, dep habarlaidy QazAqparat tilshisi.
Oblys ákimi óz úndeýinde:
«Ózderińizge belgili, Memleket basshysy Qasym-Jomart Kemeluly Toqaev elimizde koronovirýs indetiniń taralýyna bailanysty tótenshe jaǵdai jariialady. Osyǵan bailanysty bizdiń oblysta da qaýipsizdik sharalary kúsheitildi. Búgingi kúnge deiin óńirde 318 adam karantinnen ótti. Memlekettik mekeme mamandary, dárigerler kúsheitilgen rejimde jumys isteýde. Sondyqtan olardy qoldap, eńbekterine qurmetpen qaraýǵa shaqyramyn. Degenmen, aimaqta «COVID-19» virýsyn juqtyrǵan 5 qazaqstandyq anyqtalyp otyr. Bul jaǵdai turǵyndardyń qaýipsizdigin qamtamasyz etýge baǵyttalǵan qatań sharalardy qabyldaýdy talap etedi», - dep atap ótti.
Aita keteiik, Qyzylorda oblysy bas sanitar dárigeriniń 30 naýryzdaǵy №4 qaýlysymen 31 naýryz saǵat 00:00-den bastap Qyzylorda qalasyna kóliktiń barlyq túrleriniń kirip-shyǵýyna tyiym salynady. Temirjol qatynasyna shekteý 1 sáýirden bastalady.
«Oblys turǵyndarynan suraitynym, shekteý talaptaryn qatań saqtaýǵa tiispiz. Qoǵamdyq oryndarda serýendeýdi doǵaryp, úiden shyqpai, dertten oqshaýlanǵan jón. Qazir kez kelgen adam virýs juqtyrýy yqtimal. Al qaýly erejesin buzǵandarǵa zań aiasynda sharalar qoldanylady. Óńirde koronavirýs diagnozymen aýrýhanaǵa túsken eń alǵashqy naýqastyń máselesine kelsek, qyzmettik tekseris júrgizilýde. Qaýipti indet belgileriniń nelikten kesh anyqtalǵany qaralady», - dep túiindedi sózin Gúlshara Ábdiqalyqova.
Eske sala keteiik, Qyzylordada 28 naýryzda koronavirýs juqtyrǵan alǵashqy adam tirkelse, 29 naýryzda ol naýqaspen qarym-qatynasta bolǵan medbikeden de sol diagnoz naqtylandy. Búgin koronavirýs juqtyrǵan taǵy úsh naýqas anyqtaldy.
