Aqmola oblysyna jumys sapary aiasynda Premer-Ministrdiń orynbasary Gúlshara Ábdiqalyqova bastaǵan úkimettik top turǵyndardy jeke qabyldap, halyqpen kezdesý ótkizdi, sondai-aq kópbalaly otbasylardyń úilerine bardy. Bul týraly primeminister.kz saitynda habarlandy.
Aqmola oblysyna jumys sapary barysynda Shýchinsk qalasynyń Joǵary pedagogikalyq kolledjiniń jastarymen kezdesý ótkizildi. Vitse-Premer Jastar jylyn ótkizý jónindegi jol kartasy aiasynda 5 negizgi baǵyt boiynsha 80-nen astam is-shara iske asyrylyp jatqanyna basa nazar aýdardy.
Sharalar jastardy baspanamen qamtý, jumyspen qamtý, bilim berýdi damytý, volonterlik, ǵylymi granttar berý, áleýmettik belsendilikti keńeitý, jas otbasylardy qoldaý, densaýlyq jáne áleýmettik inkliýzivtilik máselelerin qamtidy.
Búginde kolledjde «Bastaýysh bilim berý», «Mektepke deiingi tárbie men oqytý», «Dene shynyqtyrý jáne sport», «Kásiptik oqytý», «Mýzykalyq bilim berý», «Negizgi orta bilim» mamandyqtary boiynsha 1 myńnan astam stýdent bilim alyp jatyr. Eńbekpen qamtylý úlesi 97% quraidy. Stýdentter memlekettik jastar saiasatyna qoldaý bildire otyryp, ózderiniń kreativti usynystary men ideialaryn jetkizdi.
Sonymen qatar, Býrabai aýdanynyń Kenesary aýylynyń, Birjan sal aýdanynyń Makinka aýylynyń jáne Bulandy aýdanynyń Altyndy aýylynyń halqymen kezdesýler ótkizildi.
«Árbir baǵyt ólshenetin kórsetkishterimen, tetikterimen jáne solarǵa arnaiy bólingen qarajattarmen naqty ári aiqyn sharalardan turady. Olar halyqtyń áleýmettik osal toptaryn qorǵaýdy kúsheitýge, sondai-aq olardyń ál-aýqatyn arttyrýǵa múmkindikter men jaǵdailar jasaýǵa jol ashady. Azamattardyń ál-aýqaty solarǵa bailanysty. Qolynan keletinniń bári eńbek etýge mindetti. Al dene múmkindikterine nemese ózge de sebepterge bailanysty jumys isteýge múmkindikteri joq azamattarǵa memleket áleýmettik qoldaý kórsetýde», — dedi G. Ábdiqalyqova.
Premer-Ministrdiń orynbasary kóp balaly jáne az qamtylǵan otbasylarǵa da bardy. Tilek Tólegenniń otbasynda mektep jasyndaǵy 4 bala bar. «Eńbek» ónimdi jumyspen qamtý jáne jappai kásipkerlikti damytý baǵdarlamasy aiasynda 2 mln 200 myń teńge kóleminde shaǵyn nesie alǵan otaǵasy 10 iri qara mal satyp alǵan. Aýyl biznesmeni óz otbasyn tolyq qamtamasyz etip qana qoimai, jańa jumys oryndaryn da ashyp otyr. G. Ábdiqalyqova oblys basshylyǵyna osyndai oń tájiribelerge jan-jaqty qoldaý kórsetýdi tapsyrdy.
Jumys tobynyń músheleri Aqmola oblysynyń basqa aýdandary men aýyldarynda da boldy.
Bilim jáne ǵylym ministri K. Shámshidinova birqatar bilim berý nysandaryn aralady. Olardyń arasynda «Aisha» jáne «Baldyrǵan» balabaqshalary, AT-litsei, Sh. Ýálihanov atyndaǵy Kókshetaý memlekettik ýniversiteti, Kókshetaý qalasyndaǵy Joǵarǵy tehnikalyq kolledj, Zerendi aýdanyndaǵy Shaǵalaly aýyly Joǵarǵy agrotehnikalyq kolledji, Zerendi aýylyndaǵy M. Ǵabdýllin atyndaǵy mektep-internat, Aqkól balalar úii bar.
2018 jyly Elbasy tapsyrmasy boiynsha jańa attestattaý júiesine sáikes sanattaryn rastaǵan jáne jańartylǵan bilim mazmunymen jumys isteitin mektep muǵalimderiniń jalaqysy 30-50%-ǵa kóterilgeni belgili. Maýsym aiynan bastap mektepke deiingi bilim berý uiymdarynyń tárbieshileri men tárbieshilerdiń kómekshileri t. b. úshin saralanǵan jalaqy 30%-ǵa deiin artady. Sonymen qosa, oblysta úsh aýysymdyq oqytý máselesin sheshý úshin 7 nysannyń jáne oqýshylardyń oryn tapshylyǵyn joiý úshin bir nysannyń qurylysy júrip jatyr. Biyl 280 oryndyq 1 balabaqshany paidalanýǵa engizý, 1075 oryndyq 10 mektepke deiingi uiymdy ashý jáne jumys istep turǵan 120 oryndy keńeitý josparlanǵan.
Respýblikalyq biýdjet qarajaty esebinen 8,2 mlrd teńge somasyna 7 nysan salynyp jatyr. Onyń ishinde 2 nysandy 2019 jyly paidalanýǵa berý kózdelgen.
Densaýlyq saqtaý ministri E. Birtanov jumys sapary aiasynda Bulandy, Eńbekshilder, Stepnogor jáne Aqkól aýrýhanalarynyń meditsina qaýymymen kezdesti. Densaýlyq saqtaý júiesiniń qyzmetkerlerine alǵashqy meditsinalyq-sanitarlyq kómektiń sapasy men qoljetimdiligin arttyrý, eńbekaqyny kóterý, salany tsifrlandyrý t.b. boiynsha qabyldanyp jatqan sharalar túsindirildi.
«Nur Otan» partiiasynyń hatshysy F. Qýanǵanov Esil jáne Astrahan aýdandarynyń turǵyndarymen kezdesý barysynda Elbasy N. Á. Nazarbaev «Nur Otan» partiiasyna 4 jańa jobany iske qosýdy tapsyrǵanyn atap aitty, olar: injenerlik jáne áleýmettik infraqurylymdy damytýǵa basymdyq berýmen «Qutty meken»; aýyldy damytýǵa baǵyttalǵan «Aýyl – El besigi»; kóp balaly jáne az qamtylǵan otbasylardy qoldaý boiynsha «Baqytty otbasy»; partiianyń Qoǵam qabyldaýlary negizinde halyqtyń áleýmettik qorǵalatyn tobyn qoldaýǵa baǵyttalǵan «Halyqqa kómek» biryńǵai áleýmettik terezesi.
Sonymen qatar, jumys tobynyń árbir múshesi azamattarǵa jeke qabyldaýlar ótkizip, oblystaǵy aýyldar men qalalardyń turǵyndarymen kezdesti.
Eske sala keteiik, QR Premer-Ministriniń orynbasary G. Ábdiqalyqova bastaǵan Úkimettiń jumys tobynyń quramyna eńbek jáne halyqty áleýmettik qorǵaý ministri B. Saparbaev, bilim jáne ǵylym ministri K. Shámshidinova, densaýlyq saqtaý ministri E. Birtanov, Qurylys jáne turǵyn úi-kommýnaldyq sharýashylyq isteri komitetiniń tóraǵasy M. Jaiymbetov, «Nur Otan» partiiasynyń hatshysy F. Qýanǵanov, «Atameken» UKP basqarma tóraǵasynyń orynbasary L. Ramazanova, sondai-aq BAQ ókilderi men blogerler kirdi. Elbasynyń «Áleýmettik qamqorlyq» jańa áleýmettik sharalaryn túsindirý maqsatymen el óńirlerine jumys saparlary jalǵasatyn bolady.
