Ózbekstannyń birinshi prezidenti, marqum Islam Karimovtiń jieni Iman Karimova Instagram paraqshasy arqyly Ózbekstan memlekettik qaýipsizdik qyzmeti men bas prokýratýrasyna úndeý jasady. Ol qamaýda otyrǵan anasy Gúlnara Karimovaǵa túrmede qysym jasalatyny týraly málimdegen. "Túrmede tiisti meditsinalyq kómek kórsetilmegendikten anamnyń jaǵdaiy kúnnen-kúnge nasharlap bara jatyr" dep málimdegen 21 jastaǵy Iman Karimova.
Biyl kóktemde túrmede otyrǵan Gúlnara Karimovamen jolyqqan onyń shveitsariialyq advokaty Gregýar Manja da Imannyń sózin rastaidy.
"Karimovaǵa em-dom jasalmaidy. Bizben kezdeskennen keiin ony túrmeniń meditsinalyq blogynan shyǵaryp jibergen. Dárigerge de jolyqtyrmai, oǵan únemi psihologiialyq qysym jasaidy" dep jazady advokat óziniń Twitter paraqshasynda.
Ótken aptada Ózbekstan bas prokýratýrasy Gúlnara Karimovaǵa "qysym jasalyp, meditsinalyq kómek kórsetilmei jatyr" degen aqparatty joqqa shyǵarǵan. "Densaýlyǵy qalypty, qajetti meditsinalyq em-domnyń barlyǵyn jasaýǵa kepil beremiz" dep málimdegen prokýratýra.
Ózbekstanda Gúlnara Karimovanyń ústinen eki qylmystyq is qozǵalǵan. Tergeýshiler "memleketke eki milliard dollar ziian kelgen" deidi.
2015 jyly Tashkent soty Gúlnara Karimovany salyqtan jaltarý, aqsha jymqyrý jáne bopsalaý qylmystaryna aiypty dep tanyp, bes jylǵa bas bostandyǵyn shektegen. Keiin onyń ústinen qarjy alaiaqtyǵyn jasaǵan, shetel valiýtasyn jasyrǵan, keden zańyn buzǵan jáne qylmystyq jolmen tapqan aqshany zańdastyrǵan degen aiyptar boiynsha taǵy bir is qozǵaǵan.
2017 jyly jeltoqsanda Ózbekstan soty Gúlnara Karimovany 10 jylǵa bas bostandyǵynan aiyrǵan. 2018 jyly jazda onyń jazasyn jeńildetip, bes jylǵa bas bostandyǵyn shekteý jazasyna aýystyrǵan. Sot úkimine sáikes, Gúlnara Karimova qyzy Imannyń úiinde óteýi tiis bolǵan, onyń úiden shyǵýyna jáne internet pen bailanys quraldaryn paidalanýyna tyiym salǵan.
2019 jyly naýryzdyń basynda Ózbekstan bas prokýratýrasy Gúlnara Karimovanyń sot sheshimimen úiqamaqtan túrmege aýystyrylǵanyn habarlaǵan. Biliktiń málimdeýinshe, úiqamaqta otyrǵan Gúlnara Karimova "jaza óteý sharty men tártibin qasaqana buzǵan": birneshe ret bailanys quraldaryn paidalanyp, qyzynyń úiinen ruqsatsyz shyǵyp ketken.
2013 jyly shvetsiialyq basylymdar Ózbekstanǵa investitsiia salýǵa yqylas bildirgen halyqaralyq kommýnikatsiialyq kompaniialardyń Gúlnara Karimovaǵa para berýge májbúr bolǵany týraly jazǵan edi. Shýly maqalalardan keiin Shvetsiia, Shveitsariia, Niderland, AQSh jáne basqa elderde tergeý bastalyp, iri telekommýnikatsiialyq kompaniialardyń is-áreketin teksere bastaǵan.
Mobildik bailanys qyzmetin kórsetetin úsh iri kompaniia - Telia, Vimpelcom jáne MTS Ózbekstannyń telekommýnikatsiialyq naryǵyna kirý úshin Gúlnara Karimovaǵa birneshe million para bergenin moiyndaǵan. Budan keiin AQSh resmi túrde Karimovany para aldy jáne 865 million dollar qarjynyń izin jasyrdy dep aiyptaǵan.
