Ózbekstannyń birinshi prezidenti bolǵan marqum Islam Karimovtiń qamaýda otyrǵan qyzy Gúlnara Karimova memleketke ózine qozǵalǵan qylmystyq isti jabý úshin 686 million dollar usyndy.
Karimova ótinish hatyn eldiń qazirgi prezidenti Shavkat Mirziiaevke joldaǵan. Hattyń kóshirmesin 25 aqpanda Instagram jelisine Karimovanyń Londonda turatyn qyzy Iman Karimova jariialady.
Gúlnara Karimova hatynda densaýlyǵy nasharlap bara jatqanyn, balalaryn kóp jyl boiy kórmegenin jazǵan. Ol «otbasy men densaýlyǵyn saqtaý úshin barlyq qarjydan bas tartýǵa daiyn ekenin, isti japsa, 686 million dollardy memleket paidasyna beretinin» jazǵan.
Ózbekstan Joǵarǵy soty 8 qańtarda Karimovaǵa qatysty jańa is qozǵaǵan. Bul is boiynsha oǵan «memleketke tiesili eki tsement zaýytynyń aktsiiasyn satyp aldy jáne ony keiin sheteldik biznesmenderge satty» degen aiyp taǵylǵan.
47 jastaǵy Karimovanyń aqsha jymqyrý kúdigine ilingen soń, Shvetsiia men Shveitsariiada oǵan qatysty tekserý júrgen.
2014 jyly ony Tashkentte úiqamaqqa alǵan. Ol kezde Karimovanyń ákesi tiri edi jáne el basqaryp otyrǵan. Islam Karimov 2016 jyly kóz jumyp, onyń ornyna 13 jyl premer-ministr bolǵan Mirziiaev kelgen.
2017 jyly Karimovany sot 10 jylǵa túrmege qamaǵan. Birneshe aidan keiin úkim ózgerip, jaza bes jylǵa qysqardy jáne Karimova úiqamaqqa shyqty. Byltyr naýryzda ol úiqamaq tártibin buzdy dep qaita qamalǵan.
