Foto: «GULDER» ansambliniń baspasóz qyzmeti
Roza Baǵlanova atyndaǵy «Qazaqkontsert» memlekettik akademiialyq kontserttik qiymynyń «GULDER» ansambliniń 55 jyldyq mereitoiyna arnalǵan gala-kontsert ótti, dep habarlaidy Ult.kz.
Kontsert baǵdarlamasynda arnaiy ázirlengen ekskliýzivti aspaptyq-horeografiialyq qoiylymdar men jańa horeografiialyq kompozitsiianyń tusaýkeseri, avtorlyq ánder, tanymal ártistermen utymdy kollaboratsiia jáne klassikalyq ónerdiń jańa interpretatsiiasy usynyldy. Sondai-aq, ańyzǵa ainalǵan ártister men jas talanttar bir sahnada óner kórsetti.
Is-sharaǵa QP Mádeniet jáne aqparat vitse-ministri Aibek Sydyqov qatysty. Ol QP Mádeniet jáne aqparat ministri Aida Balaevanyń qttyqtaý hatyn jetkizdi:
“Jarty ǵasyrdan astam ýaqyt ishinde óner ujymy qazaq mádenietiniń jaryq juldyzyna ainalyp, qazaq ónerin álemge tanytýda mańyzdy ról atqardy. Sizder halyqtyq bi óneriniń eń úzdik dástúrlerin saqtap, ony urpaqtan-urpaqqa jetkizip kelesizder. Qazaq mádenietiniń ajyramas bóligi retinde ansambl Qazaqstan estradasynyń damýyna zor úles qosty. Búgingi tańda «Gúlder» ansambli tek Qazaqstanda ǵana emes, halyqaralyq deńgeide de keńinen tanylyp, óziniń erekshe oryndaýshylyq sheberligimen moiyndalýda. Sizderdiń sahnadaǵy árbir óner kórsetý erekshelikterińiz kórermenderge estetikalyq lázzat syilap, qazaq mádenietiniń bai murasyn kórsetip, onyń mańyzdylyǵyn aiqyndaidy,” — delindi quttyqtaý hatta.
Foto: «GULDER» ansambliniń baspasóz qyzmeti
Is-sharada Qazaqstannyń halyq ártisi, qazaq estradasynyń jaryq juldyzy Roza Rymbaeva, Qazaqstannyń eńbek sińirgen ártisi Aijan Nurmaǵambetova, Qazaqstannyń eńbek sińirgen qairatkerleri Jeńis Seidollauly, Aigúl Elshibaeva, «Daryn» memlekettik jastar syilyǵynyń laýreattary Álibek Álmadiev, Ádilhan Makin, respýblikalyq jáne halyqaralyq baiqaýlardyń laýreattary Mádi Rymbaev, Qýandyq Shalqar, Merýert Bahyt, «Astana sazy» qazaq memlekettik folklorlyq ansambli, «Astana musical» memlekettik teatry, «TURAN» etno-folklorlyq ansambli, «Samǵa» toby jáne «Gulder» ansambli óner kórsetti.
Foto: «GULDER» ansambliniń baspasóz qyzmeti
Belgili qazaqstandyq ánshiler Janar Duǵalova, ARO jáne tanymal qazaqstandyq qobyzshy Oljas Qurmanbek mereitoilyq kontsertte kórermender úshin arnaiy óner kórsetip, keshtiń kórkin qyzdyrdy.
Ansambldiń bas baletmeisteri — Anvara Sadyqova, kórkemdik jetekshisi — Abzal Ósimbaev.
«Gúlder» respýblikalyq memlekettik estradalyq jastar ansambli 1969 jyly Qazaqstannyń Halyq ártisi Gúljihan Ǵalievanyń uiymdastyrýymen qurylǵan. 1969 jyly qurylǵan «Gúlder» ansambliniń ataǵy Qazaqstanda ǵana emes, Keńes Odaǵynda dúrkirep turǵan. Ansamblge tanymaldylyq alyp kelgen Kýbanyń astanasy Gavanada ótken 11-stýdent jastar festivalinen keiin, birinen soń biri ilese kelgen respýblikalyq, halyqaralyq, álemdik deńgeili júldeler «Gúlderdiń» jankúierleriniń qataryn kóbeitti. Ansambl óziniń repertýaryn halyqtyq mýzykamen jáne zamanaýi estradalyq-bi jobalarymen tolyqtyrady.
Ansambl gastroldik saparmen álemniń túkpir-túkpirin aralady. Máskeý, Frantsiia, Germaniia, Birma, Malaiziia, Singapýr, Tseilon araly, Belgiia, Grekiia syndy elderdiń sahnasynda óner kórsetedi. Kóptegen halyqaralyq baiqaýlardan júldeli oryndarmen qaityp, Frantsiia, Germaniia syndy álemniń júzdegen áigili sahnalarynda da juldyzdary jarqyrady. Qazaqstan Respýblikasynyń halyq ártisi Roza Rymbaeva, Naǵima Esqalieva, Maqpal Júnisova, Qapash Qulysheva, Qalamqas Rahimova, QR Eńbek sińirgen ártisteri Aijan Nurmaǵambetova, Baqtiiar Tailaqbaev, sonymen qatar qazirgi estrada juldyzdary Madina Sádýaqasova, Beibit Qorǵandar osy óner ordasynyń túlekteri.
