Aqyn Gúl Zarqumardyń bir top óleńin oqyrman nazaryna usynamyz.
***
Jan álemi-
Jasyndardyń jarqylynan turatyn,
Aspan tekti,
Ańsaýlardyń ózi emes pe shyn aqyn?!
Janarymen,
Jasqap ótip, asqaq ótip barady,
Taǵdyr degen,
Tas qaladan kórmese de rahym...
* * *
Kóktem ańqyǵan aspandai kóńilim,
Kókjiekterge ulasqandai ómir-muń...
Mahabbat kútken bir júrekpen, tilekpen,
Mahabbat juttym men jupardai lepten...
Almaty qysy bul. Aspanda aq bulttar,
Aqyndar týraly aýada daqpyrt bar...
Qap-qara nietter,qarańǵy piǵyldar,
Qara jer ústine sender de syidyńdar!
Osynaý ǵalamnyń óksigin kóterip,
Otyrmyn óleńmen órt tógip,ot órip...
Tek mynaý aspanǵa kóktemin kóksegen,
Telingen júrekpen,tilekpen jetse óleń...
* * *
Saǵynyshtar-ai...
Saǵym bop kóship kóktemmen,
Jaýqazyn bolyp,
Jaiqalyp shyǵar bókterden...
Sen ediń meni,
Sezimmen kelip terbetip,
Júrekke sónbes,
Júz jyldyq alaý,ot bergen...
Saǵynyshtar-ai,
Saryla kútken shaqtar myń,
Astynda qalǵan,
Aqpanda jaýǵan aq qardyń...
Sen meniń mynaý,
Sezimtal kóńil kógimniń,
Kóktem bop kelip,
Kókirek sherin aqtarǵyń...
Saǵynyshtar-ai,
Samalmen jetken syr syndy,
Alasyń neǵyp,
Alańsyz shaqta shyrqymdy?!
Sen meni izdep,
Sen meni ańsar sátterdiń,
Tańdaiy jibip,
Tamyryna da nur sińdi...
* * *
Taǵdyrdyń qatty, tasbaýyr ekeni ras-ty,
Talai kúnderim armanmen,muńmen qyr asty...
Asyl degeniń baqyr bop shyǵar sátterden,
Asqaq turýǵa qudaidyń ózi dát bergen...
Qara kózdiń de jasyrǵan syry bar uqsań,
Qarańǵylyqty ysyryp tastar jaryq tań...
Anyq degeniń tamuq bop jatsa joq shara,
Arman bar sirá,alaýlap janǵan otta da...
Talanttyń bári kúiinip óter taǵdyr shyn:
Talqylap,talap, tobyrǵa kórin qazdyrsyn!
Jalasy jalǵan, ósegi órttei qoǵamda,
Jaýhardy kórse toǵytar toqtaý toǵanǵa...
Ataq pen mansap qulqynǵa ǵana táýeldi,
Aqiqat jalǵyz aspanda qaldy, áýelgi...
Jasandy bári,jasandy álem,tirshilik,
Jalǵan dúnie jasaidy kókke qulshylyq...
Aspannyń biraq,jetpeidi-aý pende sertine,
Aǵyp túsedi jasyndar ǵana jer tile...
* * *
Seziný seni qandai ǵanibet,
Sulý da nurly ǵumyrym?!
Men sendegi ǵashyq júrektiń,
Syrshyl bir arman-muńymyn...
* * *
Óleńmen birge ótkizer talai kún-aidy,
Aqynnyń muńy nelikten sulý, shyraily?!
Órtenip-janǵan, ókingen qusa júregi,
Ańsaryn izdep aspanda júrgen syńaily.
Kútedi bálkim, kútkendei qustar kóktemdi,
Saǵynysh eken ańsaýdyń bári ótkendi.
Kúmis syrǵaly jastyqtyń nurly beinesi,
Samyrsyn toly aralap júrer bókterdi.
Qanshama arman túsime enip, qara úzdi,
Shashtarym qara shashylyp ketken tárizdi.
Qasqaiyp turǵan Altaiym seniń baýyryńda,
Shaiqalmai qalǵan dúniedegi asyl,bar izgi.
Altaiyn ańsap kóńilim kókti sharlaidy,
Saǵynysh eken mendegi bildim,bar qaiǵy.
Arshasy ańqyp túsime engen týǵan el,
Samalyńmenen sipaisyń kelip mańdaidy...
* * *
Sen meni súiesiń syrttai,
Aspannyń juldyzyn urttai.
Aidyń da nuryna kómip,
Tún bolyp tóbemnen tónip.
Taýlardyń bókterin toryp,
Kózimniń kóktemin qoryp.
Janymdy jaryqqa malyp,
Degendei,qamyqpa,nalyp.
Qushasyń elesińmenen,
Qiialǵa senesiń be sen?!
Alys bir armanǵa bastap,
Ketsek pe taǵdyrdy tastap?!
Degendei túsime enesiń,
Bizdi jurt túsine me,shyn?!
Baqytqa bastaityn joldyń,
Buralań soqpaǵy,sol-muń.
Men seni sezemin anyq-
Janymnyń ózegin jaryp.
Gúl syndy juparyn shashqan,
Saǵynysh butaǵyn basqan...
* * *
Ai tolǵan túngi aspannyń jamaly -
Aqiqattan da anyq,jap-jaryq janary!
Juldyzdar jumylǵan kirpigin asha almai,
Jumyr jer ińkárlik demin bir basa almai...
Zapyran-qusadan zar shekken júregim,
Zaý aspan sheginen izdeidi bir emin...
Qumyǵyp daýysym qalmasa eken dep,
Qunyǵyp ai saǵan án bolyp jetem tek...
Tirlikten tappaǵan baiyzym bardai-aq,
Tiledim mahabbat janyna barmai-aq...
Ómirdiń jolynda ókinish,úmit bar,
Ólimniń ózi de sezimge kiriptar!
Mahabbat tiledim aspanǵa,jerge de,
Mahabbat tiledim armanshyl keýdeme...
* * *
Iá, ol ras der edim:
Seniń meni qulai súigeniń.
Óz otyńa óziń kúigeniń!
Men ketken em ǵoi ishinde,
Arman atty kúmis kúimeniń...
Iá,moiyndar dep edim:
Ómirdiń jyldam óterin sen,
Kókke shyn kóterilseń!
Biraq,sen qalyp qoidyń,
Sheńberde óte ómirsheń...
Iá,sert bergen de sen ediń:
Maǵan degen jankeshti sezimiń úshin,
(Jalqy bop ótem dep...ózi kim úshin?!)
Taǵy da sanam sanǵa bóliner,
Jekkórip kettim tózimiń úshin...
Iá,jetpeidi saǵan deregim:
Men senen jyraq ketkenmin,
Ókindiń,jylap,kektendiń...
Aitshy óziń,osy bir sezimiń úshin,
Shyn azapty shydap, shekken kim?!
* * *
Tún. Aidyń altyn nury-
Oinaidy buǵaǵymda.
Ot demi alqyndyrdy,
Kúldim be, jyladym ba?!
Tún. Juldyz tamdy kókten,
Jansebil jastyǵyma.
Jandy kúz, jandy kóktem,
Ózekke jas tyǵyla.
Tún. Taýlar qaraýytqan,
Kózderim shaǵylysyp.
Kókjiek alaý jutqan,
Tynady laǵyl qusyp...
* * *
Ýaqytpen ólshengenniń bári muń,
Ý jutsaq ta, sý jutsaq ta kónemiz...
Jalqy qalǵan júregińniń jaryǵyn,
Jaǵa almadym, jazymyshty kómemiz.
Seniń jazǵan hattaryńnyń arty zar,
Sen shydaǵan serttiń dáti tym berik.
Tobyr syrttan ton pisher de,talqylar,
Tosyn seniń sezimińdi min kórip...
Jańbyrly tún qolshatyrdy qorǵalap,
Jalǵyzdyǵyn arqalaǵan júrekter.
Bir saǵynysh otyr bálkim, jol qarap,
Bir kem dúnie jetkizbeidi,bir ótkel...
* * *
Meniń neden túńilgenim-
Mańyzdy!
Seniń neden úgilgeniń-
Ańyz-dy...
Ekeýimizdi,
Ór etken sol Ór Altai,
Ekeýimizdi,
Ókpeletken tárizdi...
Meniń neden jylaǵanym-
Shyn edi!
Seniń neden qulaǵanyń-
Syn edi...
Keń keýdesi,
Beiish bolǵan Altaidyń,
Kerek bolsa,
Biz dep soǵar júregi...
Meniń neden qamyqqanym-
Anyq-ty!
Seniń neden jalyqqanyń-
Qalypty...
Eshkim uqpas,
Jalǵyz ǵana shyndyq bar-
Ekeýimizdi,
Ańsady Altai, zaryqty...
* * *
Maǵan búgin kerek bop tur bir óleń,
Mahabbatpen kók pen jerdi tiregen.
Sáýlesimen jylytatyn janymdy,
Sál de bolsa, taba alatyn babymdy.
Mynaý dúrmek dúnieden aýlaqqa,
Myna aqyndy alyp keter taý jaqqa.
Aspan jaqqa aparatyn sonan soń,
(Adamdar jat, bolyp ketti qoǵam toń.)
Kúzdiń muńy japyraqsha jaýǵanmen,
Kúi estidim sabyrly anaý taýdan men.
Maǵan búgin kerek bop tur bir óleń,
Mahabbatpen kók pen jerdi tiregen...
* * *
Gúl kúltesin jaryp shyqqan shyq dirili sekildi,
Bir tamshy nur tústi úzilip, sipai ótti betimdi...
Seniń meni oilaǵan sol sátterińnen bastalǵan-
Batqan kún men atqan tańdar shýaq tókti asqardan...
Qushaǵyńa umtyla almai,yntyǵa almai alystan,
Meniń sulý muńdarym-ai, qara túnmen qabysqan...
Jaqyn kelip jana almaǵan,ala almaǵan alaýyn,
Aitshy,maǵan jasyrmai-aq, júregińniń qalaýyn?!
Jasyrmaǵyń,jasyrmaǵyń... sezetinim anyq shyn,
Qarlyqtyryp bara jatyr janarymdy jaryq tún...
Seniń meni ańsaǵan sol shaqtaryńnan bastalǵan-
Erte kóktem eńilikgúli taý ótinde tas jarǵan...
* * *
Erteń taǵy kútip alar tań nurly,
Erteń talaq etemin men taǵdyrdy...
Armandardyń gúli ashylar bir demde,
Aqyn bolyp menshe ómir súrgenge...
Baqyt degen ózi qaǵar esikti,
Bar janymmen kútken edim,keshikti...
Altaiyma aparady taǵy... tús,
Arshasy ańqyp, ermen tunǵan saǵynysh...
Gúl ZARQUMAR – 1974-jyly 15-qyrkúiekte Mońǵoliianyń Ýlaanbaatar qalasynda dúniege kelgen. Monǵoliia qazaq aqyndary arasynda ótken «Altyn jebe» jyr músháirasynyń (1992 j.), Aqtan Babiulynyń 100 jyldyǵyna arnalǵan músháiranyń (1997j.) bas júldegeri. Monǵoliia Jastar odaǵynyń altyn medaliniń iegeri. 2012 jyly «Jalyn» baspasynan «Júrektegi júzik» atty kitaby jaryq kórdi.
