Grýziianyń "Biryńǵai ulttyq qozǵalys" oppozitsiialyq aliansy eldiń burynǵy prezidenti, qazir Ýkrainada júrgen Mihail Saakashvili kandidatýrasyn premer-ministrlikke usyndy. Buǵan deiin Grýziia biligi Saakashvilidi eldi basqaryp turǵan kezde "ókiletin asyra paidalandy" dep aiyptap, syrttai sottaǵan bolatyn.
"Biryńǵai ulttyq qozǵalys" uiymynyń jetekshisi Grigol Vashadze osy aptada Saakashvili Tbilisige kelgennen keiin bar mán-jaidy ózi túsindiredi dedi.
"Saakashvili halyqpen betpe-bet kezdesýi kerek" dedi Vashadze.
Grýziianyń burynǵy prezidenti Facebook jelisinde oppozitsiiadan usynys túskenin rastap, usynysty qabyldaǵanyn habarlady. 31 qazanda ótetin parlament sailaýynda oppozitsiia jeńiske jetse, Saakashvili premer-ministr bolmaq. Degenmen Saakashvili "Grýziia eńserýi tiis tereń daǵdarystan shyqqansha" iaǵni, jaǵdai turaqtalǵanǵa deiin ǵana qyzmette otyrýǵa kelisim bergen. Ol áleýmettik jelide Tbilisige sapary týraly eshteńe aitpaǵan.
Al oppozitsiianyń málimdemesine reaktsiia bildirgen Grýziianyń qazirgi premer-ministri Georgii Gahariia "Kelsin. Eldiń turaqtylyǵyna eshkim yqpal ete almaidy dep ýáde bergen edi ǵoi" degen.
Tamyz aiynda Grýziianyń ádilet ministri Teia Tsýlýkiani Saakashvilidi shekaradan ótken kezde-aq ustaidy dep aitqan edi. Grýziianyń burynǵy basshysy ózin saiasi sebeptermen qýdalap jatyr dep esepteidi.
Saakashvili 2008 jyldyń qańtarynan bastap 2013 jyldyń qarashasyna deiin Grýziiany basqarǵan. Ol eldi basqaryp turǵan kezde Grýziia NATO men EO-ǵa múshe bolýǵa umtyldy, Reseimen qarym-qatynas nasharlap, qarýly qaqtyǵystar bolyp turdy. Elde ekonomikalyq reforma júrgizilip, sonyń arqasynda jemqorlyq azaiǵan. Halyqtyń tabysy ósip, ekonomika 70 paiyzǵa ulǵaiǵan.
Degenmen Grýziianyń óz ishinde ony saiasi qarsylastaryn qýdalady jáne narazylardy kúshpen taratty dep aiyptaidy.
Prezident ókiletin aiaqtap, bilikke oppozitsiia kelgen soń Saakashvili Amerikaǵa ketken. Jańa grýzin biligi ony "jemqorlyq jasady", "ókiletin asyra paidalandy" dep aiyptady. Keiinirek syrttai alty jylǵa bas bostandyǵynan aiyrdy.
2014 jyly Ýkrainadaǵy revoliýtsiiadan keiin Saakashvili Kievke kóship kelip, Ýkraina azamattyǵyn aldy. 2015 jyly mamyr aiynda sol kezdegi Ýkraina prezidenti Petr Poroshenko ony Odessa oblysynyń gýbernatory qylyp taǵaiyndady.
Bir jarym jyldan soń Poroshenko ainalasyndaǵy sheneýniktermen til tabysa almaǵan soń Saakashvili otstavkaǵa jiberildi, oppozitsiiaǵa ketip, "Rýh novyh sil" atty jańa partiia qurdy. 2017 jyly shilde aiynda Poroshenko ony Ýkraina azamattyǵynan aiyrdy. IIM ony "shet memleketke qupiia aqparat tasydy", "jemqorlyq jasady" dep aiyptady.
Osydan soń Saakashvili Niderlandyǵa kóship ketti. 2019 jyly kóktemde prezident bolyp sailanǵan Vladimir Zelenskii onyń azamattyǵyn qaitaryp, reforma jónindegi atqarý komitetiniń jetekshisi qylyp taǵaiyndady.
