Qazaqstan shahmat federatsiiasynyń (QShF) birinshi vitse-prezidenti, grossmeister Darmen Sádýaqasov 12–25 maýsym aralyǵynda Freedom Asian Chess Initiatives (FACI) jobasy aiasynda Japoniiaǵa barady. Halyqaralyq shahmat federatsiiasynyń (FIDE) atqarýshy direktory, grossmeister Viktor Bologanmen birge olar japondyq shahmatshylar úshin bir mezgilde oiyn seanstaryn jáne bilimdik dárister ótkizedi, dep habarlaidy ult.kz.
Negizgi is-sharalar Tokio jáne Kioto qalalarynda ótedi. 13 maýsymda Tokioda The Joys of Chess with Grandmaster Legends shahmat festivali, al 14 maýsymda Kiotoda KYOCHESS Spotlight is-sharasy uiymdastyrylady. Qatysýshylar áigili grossmeisterlerge qarsy oinai alady, sondai-aq shahmattyq daiyndyqqa jáne oiynnyń qazirgi zamanǵy tendentsiialaryna arnalǵan dáristerge qatysa alady.
Darmen Sádýaqasov — 1998 jylǵy 20 jasqa deiingiler arasyndaǵy álem chempiony, grossmeister (1999), QShF birinshi vitse-prezidenti jáne Aziia shahmat federatsiiasynyń (ACF) vitse-prezidenti. Ol álemniń eks-chempiony Anatolii Karpov pen álemdik shahmat tájiniń úmitkeri Viktor Korchnoiǵa qarsy matchtarda jeńiske jetken.
Viktor Bologan — Moldovanyń tarihyndaǵy eń myqty shahmatshy, álemdik elitaǵa kirgen (FIDE reitinginde 2005 jyldyń sáýirinde 18-oryn, eń joǵary Elo reitingi — 2734, 2012 jyldyń tamyzynda). Grossmeister ataǵynan (GM, 1991) bólek, FIDE aǵa bapkeri (FST, 2012) jáne halyqaralyq uiymdastyrýshy (IO, 2025) ataqtarynyń iegeri. Ol kóptegen shahmat kitaptarynyń avtory.
Bul sapar Freedom Asian Chess Initiatives (FACI) jobasy aiasynda uiymdastyrylýda. Joba Aziia elderi arasyndaǵy shahmattyq yntymaqtastyqty damytýǵa, oiyndy tanymal etýge jáne jetekshi shahmatshylar men ulttyq federatsiialar arasynda tájiribe almasýǵa baǵyttalǵan. Jobany QShF Japoniia shahmat federatsiiasymen, FIDE jáne ACF-pen birlesip, Freedom Holding Corp. qoldaýymen júzege asyryp otyr.
