Foto: QR TSM
Belgili amerikalyq kompozitor jáne ári prodiýser, «Gremmi» syilyǵynyń eki márte laýreaty Ýolter Afanaseff Qazaqstanǵa alǵash ret kelip, Túrkistan qalasyndaǵy Dimash Qudaibergen men Hunan Broadcasting System halyqaralyq jobasyna qatysty, dep habarlaidy Ult.kz.
San ǵasyrlyq tarihtan syr shertetin Qazaqstannyń rýhani astanasy «Voice Beyond Horizon» dep atalatyn mýzykalyq baǵdarlamanyń alǵashqy túsirilim ornyna ainaldy.
Túsirilim óńirdiń týristik jáne tarihi nysandarynda ótti. Mýzykalyq joba Qytai, Qazaqstan, Qyrǵyzstan, Italiia, Malaiziia jáne Serbiia elderinen kelgen oryndaýshylardy biriktirdi.
Baiqaýǵa qatysýshylardyń kásibi deńgeiin arnaiy shaqyrylǵan halyqaralyq sarapshylar baǵalady. Qazylar alqasynyń músheleriniń biri – «Titanik» filminde oryndalǵan belgili «My Heart Will Go On» ániniń prodiýseri Ýolter Afanaseff.
«Men Qazaqstanǵa alǵash ret keldim. Bul týraly kóp jyldan beri armandadym. Alǵan áserim men sezimim erekshe: osynda turyp, ómir súrgiń keledi. Adamdary, taǵamy, klimaty, tabiǵaty – barlyǵy meni tánti etip, jan dúnieme áser etti. Shynymdy aitsam, bul - ózim bolǵan eń súiikti qalalardyń biri», – dedi Ýolter Afanaseff.
Túsirilim barysynda mýzykanttar Túrkistan oblysynyń tabiǵi jáne mádeni nysandaryn aralady. Olardyń qatarynda Áziret Sultan kesheni, Otyrar qalashyǵy, Karavansaray týristik kesheni men etnoaýyl bar.
Foto: QR TSM
Mýzykalyq jobaǵa qatysýshylardyń shyǵarmashylyq saiahaty poiyzben elimizdiń basqa óńirlerinde jalǵasady. Túsirilimder Mańǵystaý, Almaty jáne Aqmola oblystarynda, sondai-aq Almaty men Astana qalalarynda ótedi. Shoýdyń finaldyq kezeńi Qazaqstan astanasynda josparlanǵan.
Atap ótken jón, Dimash Qudaibergen bul jobany Hunan Broadcasting System arnasymen birlese júzege asyrýda. Atalǵan arnany efir men Mango TV tsifrlyq platformasy arqyly kún saiyn 210 millionnan astam kórermen tamashalaidy. Osy jobanyń arqasynda búkil álem kórermenderi Qazaqstannyń týristik áleýetimen tanysatyn bolady.
Jobaǵa Qazaqstan Respýblikasynyń Týrizm jáne sport ministrligi, QR Mádeniet jáne aqparat ministrligi, Kazakh Tourism ulttyq kompaniiasy, «Jolaýshylar tasymaly» AQ jáne óńirlik ákimdikter uiymdastyrýshylyq qoldaý kórsetti.
