2022 jyldyń sońyna deiin Eýropanyń Urenco kompaniiasy Germaniiadan Reseige 12 myń tonna iadrolyq qaldyq tasymaldaidy. Buǵan deiin onyń bir bóligi - 3500 tonnadan astam qaldyq Oral elektrohimiia kombinatyna jetkizilgen dep habarlady Greenpeace uiymy. Halyqaralyq Greenpeace uiymynyń Reseidegi bólimshesi Soltústik Rein-Vestfaliia biligi jariialaǵan resmi qujatqa súiene otyryp, osyndai málimet taratty. Ekologtar Reseide onsyz da radioaktivti ýly qaldyqtar qoimasy jetkilikti ekenin aityp, ekologiialyq ahýalǵa alańdaidy.
Greenpeace dereginshe, 2019-2022 jyldar aralyǵynda Germaniiadan Reseige 12 myń tonna iaǵni, myńnan astam radioaktivti qaldyq tielgen konteiner jóneltilmek. 2019 jyldyń mamyr men qazan ailary aralyǵynda Germaniianyń Gronaý qalasynan Reseidiń Sverdlovski oblysyndaǵy Oral elektrohimiia kombinatyna 3600 tonna radioaktivti qaldyq (alty vagon) jiberilgen.
Uiymnyń jazýynsha, Reseide qazirdiń ózinde shamamen bir million tonna radioaktivti ýran qaldyǵy bar. Bul qaldyqty paidalanýdyń jospary jasalmaǵan. Buǵan deiin qosymsha baiytqannan keiingi paida bolǵan ýran qaldyqtary Reseide qalyp qoiǵan.
Rosatomnyń "radioktivti qaldyqtan tabys tabý" saiasatyn synaǵan halyqaralyq "Ekozashita" ekologiialyq toby jetekshileriniń biri Vladimir Sliviak "órkenietti memleket úshin bul paida tabýdyń tiimdi joly emes" deidi.
Reseide ári qarai óńdeýge kelmeitin iadrolyq materialdar jáne radioaktivti qaldyqtardy saqtaý, óńdeý nemese kómý zańsyz bolyp esepteledi. Alaida zańda olardy qosymsha baiytý arqyly tabys tabý jaǵy qarastyrylǵan, tek qaldyqtardy jetkizýshi elge qaitaryp berý qajet. Ekologtar sońǵy aitylǵan erejeniń oryndalmaitynyn aitady.
