Foto: elements.envato.com
Senbide Ǵylym jáne joǵary bilim ministrliginiń resmi saitynda jáne áleýmettik jelilerinde 2023-2024 oqý jylyna arnalǵan bilim granty iegerleriniń tizimi jariialandy. Biyl granttardy taǵaiyndaý konkýrsyna qatysý úshin 94 myń talapker qujat tapsyrǵan. Bul ótken jylmen salystyrǵanda 14 myńǵa artyq.
Osy oraida burynǵy Oqý-aǵartý ministri Ashat Aimaǵambetov grantqa ie bola almaǵandarǵa arnalǵan kóp múmkindik bar ekenin aityp, áleýmettik jelidegi paraqshasynda arnaiy jazba jariialady, - dep habarlaidy "Ult aqparat".
"Kommentterde jáne jekeme de osyndai suraq kóp qoiylyp jatyr. Sondyqtan qysqasha óz oiymdy jazaiyn. Bastysy áli de grantty jeńip alýǵa múmkindik bar. Nege?
Birinshiden, igerilmegen birneshe myń grant qaitadan úlestiriledi. Iaǵni grant alǵan talapkerlerden keiin turǵan talapkerlerge UBT-da jinaǵan upai sanyna sáikes beriledi. Sony kútýge bolady. Ekinshiden, ákimdikterdiń granttary bar. Birneshe myń grant jergilikti biýdjetten bólinedi. Úshinshiden, «Qazaqstan halqyna» qorynyń granttary taǵy bar. Tórtinshiden, keibir talapkerler túrli sebep boiynsha jeńip alǵan granttarynan bas tartady. Olardyń sany da az bolmaidy. Ol granttar da qaita taǵaiyndalady. Besinshiden, tipti eshteńe bolmasa, ýniversitetke aqyly túrde túsip, keiin jaqsy oqyp, GPA joǵary bolsa, bilim alý kezinde bosaǵan bos grantty utyp alýǵa bolady. Altynshydan, "gap year" alyp, bir jyl daiyndalyp qaitadan UBT tapsyryp grantty jeńip alýǵa bolady. Ol - meniń óz basymnan ótken oqiǵa. Bul da jaqsy sheshim. Jetinshiden, kolledjge túsýge bolady. Kolledjde grant kóp, qajetti mamandyqtar boiynsha kolledj bitirgender naryqta tapshy. Kerek bolsa, birazdan keiin ári qarai JOO-ǵa túsip, qysqa merzimde joǵary bilim alyp shyǵýǵa da bolady.
Kórip otyrǵandaryńyzdai múmkindikter óte kóp. Bári áli alda. Tolyq málimet alý úshin ýniversitetterdiń qabyldaý komissiiasyna jolyǵý kerek" - dep jazdy eks-ministr.
