Batys Qazaqstan oblysynda alaiaqtyq jasaǵan memlekettik qyzmetshi sottaldy. Oral qalalyq soty oblystyq kásipkerlik jáne indýstriialyq-innovatsiialyq damý basqarmasynyń bólim basshysyna qatysty úkim shyǵardy, dep habarlaidy ult.kz.
Sot materialdaryna sáikes, sheneýnik 2025 jyldyń qazan aiynda jábirlenýshige memlekettik grant alyp berýge kómektesetinin aityp, onyń senimine kirgen. Alaida konkýrstyq komissiianyń sheshimine yqpal etýge eshqandai ókilettigi bolmaǵanyna qaramastan, jábirlenýshiden 700 myń teńge alyp, aqshany jeke paidasyna jumsaǵan.
Keiin jábirlenýshi atynan tapsyrylǵan granttyq ótinim konkýrs komissiiasynyń qoldaýyna ie bolmaǵan.
Sot barysynda aiyptalýshy óz kinásin tolyq moiyndap, keltirilgen materialdyq shyǵyndy tolyq ótegen. Jábirlenýshi de zalaldyń ótelgenin rastap, sottan jeńil jaza taǵaiyndaýdy surady.
Sot úkim shyǵarý kezinde sottalýshynyń kinásin moiyndaýyn, jasaǵan isine ókinýin, keltirilgen zalaldy tolyq óteýin jáne jábirlenýshiniń pikirin jeńildetetin mán-jailar retinde eskerdi.
Nátijesinde sot ony QR Qylmystyq kodeksiniń 190-baby 3-bóligi 2-tarmaǵy boiynsha kináli dep tanyp, urlanǵan qarajattyń on eselik mólsherine teń — 7 million teńge aiyppul saldy.
Sonymen qatar sottalǵan azamat memlekettik qyzmette jáne kvazimemlekettik sektorda laýazym atqarý quqyǵynan ómir boiyna aiyryldy. Úkim ázirge zańdy kúshine engen joq.
