Foto: gov.kz
Qazaqstan Respýblikasy Memlekettik qyzmet isteri agenttiginiń bastamasymen memlekettik qyzmet júiesindegi adami resýrstardy basqarýdyń ózekti máselelerine arnalǵan halyqaralyq GovHR forýmy ótti. Is-shara jahandyq táýekelder dáýirinde úzdik tájiribelermen almasýǵa jáne birlesken sheshimderdi ázirleýge arnalǵan biregei alańǵa ainaldy.
Forým aiasynda tájiribe almasý maqsatynda BUU ókilderi, Katar Memlekettik qyzmet jáne kadrlyq áleýetti damytý biýrosynyń direktory Saif Al-Kaabi, Mońǵoliia Memlekettik qyzmet isteri jónindegi keńestiń tóraǵasy Tsedevsýren Lhagva, Serra-Leone eliniń Adami resýrstardy basqarý keńsesiniń bas direktory Ansý Taker, Tájikstan Respýblikasy Prezidenti janyndaǵy Memlekettik qyzmet agenttiginiń direktory Ilios Idriszoda, sondai-aq AQSh, Ázerbaijan, BAÁ, Qyrǵyzstan, Marokko, Ońtústik Koreia, Ózbekstan, Resei, Rýanda, Singapýr, Túrikmenstan siiaqty áriptes elderdiń ýákiletti organdarynyń basshylary men jetekshi mamandary jáne sarapshylary qatysty.
Is-sharada Qazaqstan Respýblikasy Prezidentiniń ishki saiasat máseleleri jáne kommýnikatsiialar jónindegi kómekshisi Arman Qyryqbaev Memleket basshysy Qasym-Jomart Toqaevtyń forýmnyń ashylýyna orai joldaǵan quttyqtaý hatyn oqydy.
Darhan Jazyqbai memlekettik basqarý júiesin jańǵyrtýda Prezident tilge tiek etken «Adam memleket úshin emes, memleket adam úshin» irgeli qaǵidaty basshylyqqa alynǵanyn atap ótti. Al forýmnyń basty taqyryby memlekettik sektorda tiimdi, adamǵa baǵdarlanǵan basqarý júiesin damytýǵa arnaldy. Sondai-aq forýmda strategiialyq HR-júiesin qalyptastyrý, kadrlyq protsestterdi tsifrlandyrý men jasandy intellektini engizý, jas mamandardy qoldaý jáne memlekettik organdardaǵy basshylardyń rólin transformatsiialaý máselelerine basty nazar aýdaryldy.
Shara barysynda jańa kezeńdegi memlekettik basqarý salasyndaǵy halyqaralyq tájiribe men ǵylymi zertteýlerge negizdelgen «Public Administration in the New Reality» atty kitap tanystyryldy. Bul kitapqa 19 elden 39 avtor qatysyp, alǵy sózdi Qazaqstan Respýblikasynyń Prezidenti Qasym-Jomart Toqaev jazǵan.
Forým barysynda qazaqstandyq tarap seriktes elderdiń tabysty tájiribelerine qyzyǵýshylyq tanytty. Osy oraida, ásirese Katardyń memlekettik jáne jekemenshik sektoryna kadr irikteý platformasy sanalatyn Kawader júiesi men 85 myńnan astam memlekettik qyzmetshige SMART-maqsattar qoiý, monitoring jasaý jáne baǵalaý múmkindigin beretin Ada’a tiimdilikti basqarý júiesin erekshe atap ótýge bolady. Mońǵoliiada taǵaiyndaý jáne kadrlyq reestr protsesteri avtomattandyrylǵan arnaiy portal arqyly júrgiziledi, sondai-aq túiindemeni taldaý men úmitkerlerdi aldyn ala irikteýge múmkindik beretin jasandy intellekt negizindegi «pilottyq» modýl iske asyrylýda.
Forýmda negizgi halyqaralyq uiymdarmen ózara árekettesýge erekshe nazar aýdaryldy. Forýmǵa beinebailanys arqyly qatysqan BUU-nyń Azamattyq qyzmet jónindegi halyqaralyq komissiiasynyń (ICSC) tóraǵasy, BUU Bas hatshysynyń orynbasary Larbi Djakta Qazaqstannyń kadrlyq saiasatta ozyq kózqaras ustanyp otyrǵanyn jáne basqa elderge úlgi bola alatynyn atap ótti.
Pikir almasýlar, paneldik jáne forsait-sessiialar nátijesinde memlekettik qyzmet pen adami resýrstardy basqarý júiesin damytýǵa arnalǵan negizgi usynystar men baǵdarlardy qamtityn GovHR rezoliýtsiiasy qabyldandy. Atap aitqanda, memlekettik apparattyń tiimdiligin arttyrý jáne azamattarǵa kórsetiletin qyzmet sapasyn jaqsartýǵa baǵyttalǵan jasandy intellekt, Big Data, bulttyq sheshimder men blokchein tehnologiialaryn kezeń-kezeńmen engizý usynyldy. Sonymen qatar, derekterdi birtutas kózden basqarý, biýrokratiialyq kedergilerdi azaitý, tsifrlyq qaýipsizdikti kúsheitý jáne People Analytics quraldaryn kadrlyq sheshimder qabyldaýda belsendi paidalaný qajettiligi aityldy.
Is-sharaǵa qatysýshylar foresight-sessiialar barysynda «Quzyretter kartasy 2030», «Derekter saiasaty» jáne «HR arhetipteri 2035» tárizdi jańa HR-modelderdi qalyptastyrý boiynsha usynystar ázirledi. Osynyń negizinde tsifrlyq daǵdylarǵa basymdyq beretin jeke ári tájiribege negizdelgen oqytýǵa kóshý qajettiligi atap ótildi.
Qatysýshylar atalǵan forýmnyń bilim men tájiribe almasý alańy ǵana emes, sonymen qatar ýaqyt talaptaryna sai ozyq sheshimderdi engizýge qabiletti kásibi memlekettik qyzmet qaýymdastyǵyn qalyptastyrý jolyndaǵy mańyzdy qadam bolǵanyn atap ótti.
