Qazaqstan men Qyrǵyz Respýblikasy shekarasyndaǵy qyrǵyz tarapynyń kedendegi kemshilikterdi retke keltirý boiynsha usynysqa áli de resmi túrde jaýap kelip túsken joq. Bul týraly QR Qarjy ministrligi Memlekettik kirister komiteti tóraǵasynyń orynbasary Ǵosman Ámrin málim etti, dep habarlaidy «QazAqparat».
«Bul másele búgin ǵana paida bolǵan joq. Ótken jyldary da qyrǵyz tarapymen birneshe ret talqylanǵan. Eýraziialyq ekonomikalyq komissiiaǵa erekshe tapsyrma berilip, olardyń baiandaýy boiynsha qyrǵyz tarapynyń keden salasyna qatysty kemshilikteri men buzýshylyqtary dáleldengen. Ol anyq. Demek,bul Qazaqstannyń ózdiginen shyǵaryp alǵan sheshimi emes. Endigi kezekte muny sheshýdiń qandai joly bar? Ol - Qyrǵyz Respýblikasynyń keden qyzmetimen birlesejumys atqarý», - deidi komitet tóraǵasynyń orynbasary.
Ǵosman Ámrinniń aitýyna qaraǵanda Qazaqstan tarapynan Qyrǵyz Respýblikasyna birneshe usynys joldanǵan.
«Ótken jyly óz basym Úkimettiń tapsyrmasymen Qyrǵyzstanǵa baryp, baýyrlas halyq bolǵasyn naqty qandai másele baryn aitqan edik. Ekinshiden, osy jyly qaitadan bul máseleni kóterip otyrmyz. Jaǵdai ózgergen joq. Bárin de kedendik erejeler men talaptardy jipke tizgendei aityp, kórip otyrmyz desek te, nátije oń bolǵan joq. Jalpy olar (qyrǵyz tarapy - avt.) «Iá, qaraiyq, jumysty kúsheiteiik. Kontrabandaǵa jol bermeiik» dep aitqan. Oǵan bári kelisedi. Endigi kezekte de jumys boiynsha kelisip, birge bárin retteiik dep otyrmyz. Iaǵni jaýap kútip otyrmyz», - deidi ol.
Onyń aitýynsha, atalǵan máseleni sheshýdiń úsh joly bar. «Birinshiden, eki jaqqa da taýardyń quny birdei bolýy kerek. Salyqtarymyz birdei bolýy tiis. Kedende olar taýardy 1, biz 10 dollarmen alsaq, olai bolmaidy. Ekinshiden, erteń sóz bolmasyn, basqasha kózqaraspen qarap otyr degen túsinikti taratpaýyn, iaǵni keden boiynsha barlyq tarapqa birdei qarap otyrǵanymyzdy bildirdik. Búginge deiin usynysymyz jalǵyz - kedende birlese jumys atqarý. Úshinshiden, bir-birimizge qandai taýarlar, qashan keldi, salystyrý úshin qandai baǵamen keldi degen syńaida aqparat almasyp otyraiyq degen usynysty joldadyq. Taǵy da aitarym, baýyrlas el bolǵandyqtan, bul máseleni birlese sheshýge tyrysýymyz kerek. Kelispeitin bolsa, biz baqylaý jumysyn kúsheite beremiz», - deidi Ǵosman Ámrin.
Memlekettik kirister komiteti tóraǵasynyń orynbasarynyń sózine súiensek, kontrabanda máselesi bárine belgili bolyp otyr.
«Qyrǵyz depýtattary óz elderinde bul máseleni kótergen. Búgin paida bolǵan dúnie emes. Bárimiz de qandai jaǵdai bolǵanyn bilemiz. Qyrǵyz tarapy kelisemiz dep otyr. Biraq, resmi túrde jaýap áli kelip túsken joq», - dep túidi Ǵosman Ámrin.
.jpeg)